سیمه ییز خبرونه
په كابل ښار كې ځانمرگي ۲۶ كسانو ته مرگ و ژوبله اړولې
كابل ښار د يكشنبې په سهار د يوه ځانمرگي بريد شاهد و. بريد د سهار په شاوخوا اووه بجې د اتمې ناحيې اړوند د كارته نو په درېيم سرك كې تر سره شو، چې د ملي دفاع وزارت د هوايي ځواك د منسوبينو د ليږد كاسټر يي په نښه كړ.
د ملي دفاع وزارت وياند جنرال ظاهر عظيمي وايي، په بريد كې څلور تنه وژل شوي، چې دوه يي پوځيان او دوه نور ملكيان دي.
د ده په وينا، په پېښه كې ۲۲ نور، چې اكثره يې ملكيان دي، ټپيان شوي.
د پېښې په ځاى كې عيني شاهدانو ويلي، بريد هغه مهال تر سره شو، چې د ملي دفاع وزارت د هوايي ځواك د كاركونكيو د ليږد موټر د درېيم سرك په تمځاى كې ودريد.
د كابل امنيه قومانداني مرستيال عبدالقيوم باقي زوى د پېښې په ځاى كې خبريالانو ته وويل:
بريد كوونكي غوښتل د هوايي ځواك د كاركوونكيو كاستر موتر ته دننه شي؛ خو مخه يې ونيول شوه او ځانته يې چاودنه وركړه.
د نوموړي په وينا، په دې پېښه كې د ملي ځواكونو درې تنه او يو ملكي ښځه، چې په تمځي كې ولاړه وه ، وژل شوي دي.
وسلوالو طالبانو د دې بريد مسووليت په غاړه اخيستى دى.
له دې بريد وړاندې تېره شپه د كابل ښار د خيرخانې مينې د نجارانو په سيمه كې يوې چاودنې دوه تنه ټپيان كړي ول.
د كورنيو چارو وزارت وياند صديق صديقي وايي، چاودنه د هغه ماين له اړخه وه، چې د سړك په گلدان كې ځاى په ځاى شوي و.