په كار ده، چې د ټاكنو د خپلواك كميسيون رهبري په هېڅ ډلې ټپلې پورې تړاو ونلري

ملګري ملتونه د افغانستان د ټاكنو د خپلواك كميسيون په رهبرۍ كې د بدلون غوښتنه كوي. ملګري ملتونه وايي، افغان حكومت بايد د را روانو ولسمشريزو ټاكنو د شفافيت لپاره روښانه تګلارې خپلې كړي.

په داسې حال كې، چې د افغانستان د را روانو ولسمشريزو او ولايتي شوراګانو د ټاكنو د شفافيت او عموميت په اړوند د ملي او نړيوالو بنسټونو له خوا ټينګار مخ پر زياتېدو دى، ملګري ملتونه وايي، چې د افغانستان د راروانو ولسمشريزو ټاكنو په اړوند د خپلو ارزونو پايلې به تر راتلونكو دوو اوونيو پورې اعلام كړي.

په كابل كې د ملګرو ملتونو استازى يان كوبيش وايي:

د ټاكنو د نوي قانون تصويب، د برېښنايي تذكرو وېش، او د شكايتونو د اورېدو لپاره د يوې خپلواكې ادارې جوړښت د را روانو ولسمشريزو ټاكنو له شفافيت سره مرسته كولاى شي.

نوموړی زیاتوی، چې د ملګرو ملتونو د امنيت شورا په وروستي پرېكړه ليك كې د افغانستان د ټاكنو پر شفافيت او عموميت او د درغليو د مخنيوي لپاره د كړنلارو د جوړولو په اړوند ټينگار شوى دى. په همدې وخت كې يادونه شوې، چې ملي شورا بايد د خلكو او په ټاكنو كې د ښكېلو بنسټونو غوښتنو ته په پام د ټاكنو اړوند قوانين تصويب كړي.

يان كوبيش همدارنګه وايي، چې په كار ده د ټاكنو د خپلواك كميسيون په رهبرۍ كې هغه كسان وي، چې په هېڅ ډلې ټپلې پورې تړاو ونلري.

د ملګرو ملتونو استازي همدارنګه په ډاګه کړه، چې بايد ښه پوه شو، چې د بدلون وخت دى او دا په افرادو پورې تړلې خبره نده، خبره دا ده، چې څنګه كېږي دغه بهير ښه تر سره كړو. هيله مو ده، چې مقررۍ د مدني بنسټونو او سياسي ډلو د مشورو په بنسټ وشي تر څو داسې كس وټاكل شي، چې د ټاكنو د كميسيون خپلواكي تمثيل كړي.

هغه د ټاكنو د ترسره كېدو لپاره امنيت يو مهم عنصر بولي او له وسله والو طالبانو غواړي، چې د سولې له بهير سره يو ځاى شي.

هغه وویل، وسله والو مخالفينو ته وايم، چې تاسو افغانان ياست او بايد د خپل هېواد د حالاتو په اړوند فكر وكړئ. هغه انګېزه، چې تاسو د جګړې دوام ته هڅوي له دوه زره څوارلسم كال وروسته له منځه ځي او نړيوال سرتېري له افغانستان څخه وځي.

ملګري ملتونه په داسې حال كې د افغانستان د راروانو ولسمشريزو ټاكنو د شفافيت پر عناصرو خبرې كوي، چې تر دې مخكې امريكايي چارواكو په ډاګه ويلي، چې په راروانو ټاكنو كې به له هېڅ يوه كانديد څخه ملاتړ ونه كړي.