سیمه ییز خبرونه
په كندز كې ځانمرگي بريد مرگ و ژوبله رامنځته كړه
د كندز ولايت د قرلق د اړوند سيمې په يو جومات كې د يوې فاتحې پر مهال ځانمرگي برید د دشت ارچي د ولسوال شیخ صدرالدین په گډون دولس كسان وژلي او ۲۰ نور ټپيان دي.
امنيتي چارواكي وايي:
برید نن سهار شاوخوا اته نیمې بجې هغه مهال د دشت ارچي ولسوالۍ د قرلق په سیمه کې وشو، چې ولسوال جومات ته د ننوتو په حال كې و.
د کندز د امنيه قوماندانۍ امنيت امر سمونوال عبادالله د دې خبر د پخلي تر څنگ په ډاگه كړه، چې:
د لومړنيو معلوماتو له مخې په وژل شويو کې د دشت ارچي ولسوال شيخ صدرالدين، د ولسوالۍ اداري مدير، د ولسوالۍ يو شمېر ساتونکي او د قرلق د سيمې يو شمېر سپين ږيري شامل دي.
نوموړي زياته کړه، چې د دې پېښې ټپيان ملکي وگړي دي او امکان لري، چې وروسته د تلفاتو شمېر لوړشي.
شیخ صدرالدین له تېرو نږدې پېنځه کلونو راهیسې د کندوز د دشت ارچي ولسوال و، چې وړاندې هم چاودنې او بریدونه پرې شوي ول. دى وزبک ټبرى و، چې د شمال ټلوالې په لیکو کې له طالبانو سره تر مرگه جنگېدلی دی.
تر اوسه د دغه برید پړه چا نه ده منلې.