سیمه ییز خبرونه
په كندهار ولايت كې ماين چاودنې ۲۲ ملكي وگړيو ته مرگ و ژوبله اړولې
Last Updated on: لړم ۳, ۱۴۰۱
په كندهار ولايت كې نن غرمه(۱۲:۳۰) يوې بمي چاودنې لس ملكي وگړي ووژل او دولس نوريې ټپيان كړل.
د كندهار ولايت امنيه قوماندان عبدالرزاق د پېښې په تائيد وويل:
پېښه د كندهار ولايت د معروف او ارغستان ولسواليو ترمنځ هغه مهال رامنځته شوه ، چې د ملكي وگړيو يو فلاينكوچ د سرك غاړې له ماين چاودنې سره مخ شو.
د نوموړي په وينا، په وژل شويو كې درې ښځې او څلور ماشومان هم شته.
د قوماندان عبدالرزاق د څرگندونو له مخې ټپيان روغتون ته ليږدول شوي او روغتيايي حالت يې د اندېښنې وړ نه دى.
د يادونې وړ ده، چې د هوا په توديدو يو ځل بيا په دې ولايت كې د ناامنيو اندېښنې راپورته شوې دي.