سیمه ییز خبرونه
په مركزي بغلان كې اوولس وسلوال طالبان وژل شوي
د بغلان ولايت د مركزي بغلان په ولسوالۍ كې د افغان امنيتي ځواكونو په تازه عملياتو كې اوولس وسلوال طالبان وژل شوي، نهه نور ژوندي نيول شوي او پېنځه ټپيان دي.
د بغلان امنيه قوماندان وايي:
دا عمليات تېره شپه(د زمري ۲۴) اته بجې د مركزي بغلان د انارخېلو په سيمه كې د وسلوالو د له منځه وړلو په موخه تر سره شول، چې د زمري د مياشتې د ۲۵ نېټې تر غرمې يي دوام درلود.
طالبان ادعا كوي، چې په دې سيمه كې يي څلور پوليس وژلي، خو د بغلان امنيه قوماندان دا څرگندونې ردوي.
په دې عملياتو كې د ملي اردو، ملي پوليسو او ملي امنيت لسگونه سرتېرو او منسوبينو برخه درلوده.
د بغلان امنيه قوماندان اسدالله شیرزاد زياتوي:
په دې عملياتو كې لس كلي د وسلوالو له شتون پاك شوي او دښمن ته درانده تلفات اوښتي دي.
د نوموړي په وينا، په وژل شويو وسلوالو كې د مركزي بغلان د ولسوالۍ لپاره د طالبانو ولسوال ملا نثار او د طالبانو څلور كليدي افراد هم شامل دي.
كورنيو چارو وزارت هم په يوه خبرپاڼه كې د دې عملياتو پخلى كړى او ويلي يي دي، چې ملي پوليسو د سرپل ولايت د كوهستاناتو په ولسوالۍ كې هم عمليات كړي، چې په كې څلور وسلوال وژل شوي دي.