سیمه ییز خبرونه
په مزارشريف كې د اورلوبې مراسم ترسره شول
په بلخ كې هركال د نوي كال د هركلي په موخه د اورلوبې مراسم تر سره كيږي.
تېره شپه د گل سرخ زرگونه گډونوالو په واټونو كې د خوښى مراسم جوړ او شپه يې په سندرو او نڅاوو تېره كړه.
په مزارشريف كې د نوي كال د لومړۍ ورځ مراسم په سختو امنيتي تدبيرونو اوخوندي فضا كې ترسره شول، په مزارشريف كې د نوي كال لومړۍ شپې آسمان د اورلوبې رڼا گاڼو ښكلى كړى و.
د نوي كال د ميلې زرگونه مينه والو، چې ډېر يې ځوانان دي د مزارشريف په ښار او واټونو كې اورلوبې كوي، تبلې وهي او نڅاوې كوي.
دغه ځوانان ښايي په تېر كال كې له خونړيو پېښو تنگ شوي او د زړه له تله غواړي، چې خوښي وكړي.
جوزجاني ځوان وايي، خوښ دى، چې د خلكو د خوښۍ له پاره د بلخ ښار ته راغلى او خوند اخلي.
كه څه هم اورلوبې ډېر دوام ونه كړ، خو خلكو تر نيمې شپې پورې په ښار كې په خوښيو نوى كال ونمانځه .