په میدان وردګ کې د نامسووله وسلوالو او پولیسو له نښتو ۹ کسان وژل شوي

کورنیو چارو وزارت د میدان وردګ ولایت بهسود ولسوالۍ ته یو پلاوی استوي، چې د امنیتي ځواکونو او د دوی په وینا د نامسوولو وسلوالو ترمنځ نښته وڅېړي، چې په کې ۹ کسان وژل شوي او د ۵ پولیسو په ګډون ۷ نامسووله وسلوال ټپیان دي.

د دغه وزارت ویاند طارق آرین په په ډاګه کړې؛ په دې ولسوالۍ کې نښتې هغه مهال رامنځته شوې، چې د علی پور نامسووله وسلوالو د بهسود لومړۍ او دوه یمې برخو ولسوالیو ته د امنیه قومندانانو د ورپېژندنې او د پوستو جوړولو مخه ونیوله.

طارق آرین ویلي: د جمعې پر ورځ د علی پور یو شمېر نامسوول وسلوال د بهسودو ولسوالۍ ودانۍ مخې ته راټول شوي وه او پر امنیتي ځواکونو او خلکو یې ډزې وکړې. له بده مرغه، د لاریون تر نامه لاندې او له خلکو څخه په ګټه اخیستنه یې یو شمېر امنیتي ځواکونه او ځایي اوسیدونکي ټپیان او ووژل شول.

طارق آرین ټینګار وکړ، چې د پولیسو ځواکونو د وضعیت د ښه کولولپاره هوایي ډزې کړې وې.

هغه زیاته کړې: د دغه وسلوال برید په تړاو پولیسو ۶۸ نامسوول وسلوال نیولي او وضعیت اوس د پولیسو تر څارنې لاندې دی.

د ولسي جرګې د غزني استازي مهدي راسخ ویلي، چې د میدان وردګو امنیه قومندان پر سپارښتنه امنیتي ځواکونو پر خلکو ډزې کړې دي.

د راسخ د څرګندونو له مخې؛ دا په داسې حال کې ده، چې د بهسود دغه شخړه نده حل شوې؛ خو طالبانو پر سرچشمه سیاخاک برید کړی او جګړه روانه ده. که دا مسله ژر تر ژره حل نشي؛ نو بدې پایلې به ولري.