تازه خبرونه
په ننګرهار او پکتیکا کې د ترافیکي پېښو له کبله ۲۲ کسانو ته مرګ و ژوبله اوښتې
په ننګرهار او پکتیکا ولایتونو کې له دوه ترافیکي پېښو څخه لږ تر لږه دوه کسان مړه شوي او شل نور ټپیان دي.
لومړۍ پېښه نن (دوشنبه د وري ۹) د جلال آباد – تورخم د لویې لارې د سرخ دیوال په اړوند سیمه کې هغه مهال رامنځته شوه، چې د ناوې او ناوک موټر له یوې بلې کرولا موټر سره ټکر وکړ.
د ننګرهار والي ویاند عطاء الله خوږیاڼي څرګنده کړې، چې په دې پېښه کې د یوه ماشوم په ګډون دوه کسان مړه شوي او د ناوې او ناوک په ګډون اووه نور ټپیان شوي دي.
د عطاء الله خوږیاڼي د څرګندونو له مخې؛ میلمنو د واده په مراسمو کې د موټر ځغلونې سیالي کړې، چې په پایله کې یې یو موټر د ناوې او ناوک له موټر سره ټکر شو.
دغه راز د پکتیکا ولایت مرکز ښرنې ښار او ارګون ولسوالۍ ترمنځ په ورته یوه بله ترافیکي پېښه کې لږ تر لږه ۱۳ کسان ټپیان شوي دي.
د پکتیکا د پولیسو ویاند شاه محمد آرین ویلي، چې په پېښه کې د شپږ ټپيانو حالت د اندېښنې وړ دی.