تازه خبرونه
په ننګرهار کې د ملي پوځ چورلکه راغورزېدلې – دفاع وزارت
د افغانستان ملي دفاع وزارت نن (چارشنبه د لړم ۲۱) په ډاګه کړې، چې تېره شپه په ننګرهار کې د ملي پوځ یوه چورلکه د تخنیکي ستونزو له کبله د الوتنې پرمهال د دغه ولایت په حصارک ولسوالۍ کې راغورزېدلې ده.
دغه وزارت زیاته کړې، چې پېښه تېره شپه د ۱۲ بجې رامنځته شوې، چې په کې د چورلکې یوه عمله او یو پولیس وژل شوي او دوه نور ټپیان دي.
په ننګرهار کې ځایي چارواکو ويلي، چې دوه افغان چورلکې تېره شپه د دې ولایت په حصارک ولسوالۍ کې راغورزېدلې دي.
د حصارک ولسوالۍ امنیتي سرچینو ويلي؛ چورلکې تازه دمي سرتېري او د دغې ولسوالۍ نوی ولسوال رالیږدولي وه، چې د الوتنې پرمهال راوغورزېده؛ ۱۰ کسان په کې ټپیان شول، چې نورو چورلکو کابل ته ولیږدول.
ننگرهار والي پېښه منلې؛ خو د جزئیاتو په اړه یې څه ندي ویلي.
عیني شاهدانو ويلي، چې راغورزېدلې الوتکې اوس هم د پېښې په ځای کې دي او امنیتي ځواکونو د پېښې ځای محاصره کړی دی.
طالبانو د ملي پوځ د دغو ام آی ـ ۱۷ ډوله چورلکو د رانسکورولړ پړه پر غاړه اخیستې ده.
دا په داسې حال کې ده، چې څه موده مخکې په هلمند ولایت کې هم دوه چورلکې راوغورزېدې او پیلوتان یې مړه شول.