سیمه ییز خبرونه
په هېواد كې د حكومت گونگو پرېكړو اقتصادي ستونزې رامنځته كړي
د افغانستان د سوداگرۍ خونې مرستيال خان جان الكوزي وايي، چې:
د افغان حكومت ناكامه پالسيو افغان سوداگر له گڼو ستونزو سره مخ كړي دي.
نوموړى وايي:
په دې روستيو كي د هېواد يو ملي سوداگر په حيرتانو كي د نفتو د تصفيې كمپني جوړه كړې، چې په كال كي د ۲ لكه ټنه نفتو توليد او تصفيې ظرفيت لري.
د سوداگرۍ وزارت بيا نوموړي ته په كال كې د پېنځه سوه زره ټنه تېلو د توليد او تصفيې جواز وكړى، چې په كې ۴۵۰ تنو ته مستقيم او نږدي ۵ زره نورو ته غيرمستقيم د كار زمينه برابريږي.
بل خوا د نفتي موادو يوويشت واردوونكي شركتونه ادعا لري، چې ياده فابريكه په نړيوالو ميعارونو برابر نفتي توكې نه شي برابرولى.
دوى له دولت څخه د دغو ستونزو د حل غوښتنه كوي او وايي:
كه ستونزه اواره نه شي؛ نو د نفتو بيه به نوره هم لوړه شي.
دا په داسې حال كې ده، چې د نفتو د تصفيه كوونكيو او د نفتي موادو د واردوونكيو ترمنځ ستونزې ډېرې شوې دي.
كه څه هم د جمعې په ورځ(د وږي لومړۍ) د افغانستان سوداگرۍ خونې د شركتونو د ادعاوو د اثبات لپاره دواړه خواوې راغوښتې وې، چې دا ستونزه د رسنيو په وړاندې اواره شي؛ خو يوه خوا هم دې ناستې ته نه ده حاضره شوې.
د يادونې وړ ده، چې د سوداگرۍ وزارت هم په دې اړه تر دې دمه څه نه دي ويلي.