په هېواد كې د كاست نړيوال بنسټ په همكارۍ يوه نوې څانگه پرانيستل شوه

د افغانستان د اقتصاد وزارت په ودانيزو او بېخبنايي پروژو كې د فساد د مخنيوي په موخه د كاست نړيوال بنسټ په همكارۍ يوه نوې څانگه پرانيستل شوه.

د افغانستان د اقتصاد وزارت وايي، چي د افغانستان په بېخبنايي او ساختماني پروژو كي  د اداري فساد له كبله د افغانستان د پرمختيا مخه ډب شوې ده.

د اقتصاد وزير عبدالهادي ارغنديوال وايي:

د كاست له نړيوال بنسټ سره د بېخبنايي پروژو د څارنې په موخه يو هوكړه ليك لاسليك شو.

ښاغلى عبدالهادي ارغنديوال زياتوي:

په تېرو لس كلونو كې د مرستندويه هېوادونو له خوا د ډېرو ساختماني او بېخبنايي پروژ پايلې رڼې نه دي.

د ولسمشر سلاكار محمد ياسين عثماني وايي:

د اداري فساد له كبله افغانستان له لوى  ناورين سره مخ دى او د فساد په وړاندې د مبارزې په موخه جوړو شويو بنسټونو په ډېرو برخو كې ښه پايله نه لرله.

هغه هيله څرگنده كړه، چې د اقتصاد په وزارت كې د دې څانگې په جوړيدو وتوانيږو، چې  د نړيوالې ټولني لخوا د پروژو د تطبيق په برخه كي كره معلومات تر لاسه او د فساد په مخنيوي كي به ښه  پايله ولرو.

په ساختماني سكتور كي د رونټيا  نړيوال بنسټ يا كاست وايي:

افغانستان د ساختماني پروژو په برخه كي ډېرې ستونزي لري او ژمن يو، چي  د فساد په له منځه وړلو كې له افغانستان سره مرسته او همكاري وكړو.

د يادونې وړ ده، چې كاست يو نړيوال بنسټ دى، چې د ساختماني پروژو د شفافيت په اړه څېړنه كوي.