په ټاكنو كې درغلي به نړيوالې ژمنې زيانمنې كړي

د سولې د ساتنې په برخه كې د ملگرو ملتونو د سرمنشي مرستيال د پنجشنبې په ورځ(د وري ۷) په كابل كې يوې خبري غونډه ته وويل، په افغانستان كې د ټاكنو د تر سره كيدو لپاره ژمن يو.

هغه خبردارى وركړ، چې په ټاكنو كې پراخه درغلي به نه يوازې دا، چې د ټاكنو پر وروستيو پايلو اغېز وكړي، بلكې له افغانستان سره به د نړيوالو مرستې او ژمنې هم اغېزمنې كړي.

د سولې د ساتنې په چارو كې د ملگرو ملتونو د سرمنشي مرستيال اروي لتسوس وايي:

په راتلونكيو ټاكنو كې له درغليو څخه مخنيوى د افغان دولت او افغانانو مسووليت دى؛ خو د كورنيو او بهرنيو څارونكيو شتون به د رڼو ټاكنو ضمانت وكړي.

نوموړي وويل، ملگري ملتونه به په راتلونكيو ټاكنو كې بې پرې عمل وكړي او ټينگار يي وكړ، چې د ټاكنو تر سره كيدل هغه پروسه ده، چې بايد مالكيت يي افغانان ولري او نړيواله ټولنه به په دې برخه كې مرسته كوي.

هغه وايي:

ملگري ملتونه د افغان دولت تر څنگ د دې پروسې د برياليتوب لپاره چمتوالى لري او هيڅ راز لاسوهنه به په كې ونه كړي.

نوموړى افغانستان ته روان كال مهم بولي او هيله من دى، چې د سياسي واك ليږد په سوله ييز ډول تر سره شي.

ښاغلي اروي لتسوس په ډاگه كړه، چې:

كانديدان بايد سر له اوسه قانع شي، چې د ټاكنو پايلې ومني؛ ځكه راتلونكيو تاكنو ته چمتوالى د تېرو ټاكنو په پرتله ښه روان دى.

د سولې د ساتنې په چارو كې د ملگرو ملتونو د سرمنشي مرستيال همدا راز وايي، د افغانستان د ديموكراسۍ دښمنان هڅه كوي، چې د رايو صندوقونو ته د افغانانو د تگ مخنيوى وكړي؛ خو دا چاره د ټولو افغانانو استازيتوب نه كوي.