سیمه ییز خبرونه
په پروان ولايت كې پر ۶۳۰ جريبه ځمكه صنعتي پارك جوړيږي
د پروان والي وايي، په دې پارك كې د پانگوالو لپاره د آسانتيا په موخه د ځمكې د وېش او استملاك چارې هم پيل شوې دي.
د پروان والي عبدالبصير سالنگي وايي:
په دې پارك كې هغو پانگوالو ته ځمكه وېشل كيږي، چې د كورنيو توليداتو د ودې او كارموندنې لپاره اغېزمن اقتصادي پروگرام ولري.
د پروان والي عبدالبصير سالنگي په ډاگه كړه، چې هغو كسانو ته به فرصت ورنه كړ شي، چې د توليدي كارخانو د جوړولو په پلمه د دغه پارك ځمكې غصب كړي.
په افغانستان كې د پانگونې ملاتړ اداره يا آيسا وايي، په تېرو يوولس كلونو كې كورني توليدات د قناعت وړ نه دي او د لويو صنعتي پاركونو نشتوالى د كورنيو پانگوالو لپاره يوه لويه ستونزه ده .
د افغانستان د پانگونې د ملاتړ ادارې رييس وفي الله افتخار وايي، د كورنيو توليداتو په وړاندې لويه ستونزه د صنعتي پاركونو نشتوالى دى.
د دغې ادارې رييس وايي، په بېلابېلو ولايتونو كې به د صنعتي پاركونو د جوړولو لپاره د زمينې د برابرولو هڅو ته دوام وركړي.
له دې وړاندې د افغانستان د پانگونې ملاتړ ادارې اعلام وكړ، چې د روان كال ترپايه به په بېلابېلو ولايتونو كې لږ تر لږه څلور صنعتي پاركونه د پانگوالو په واك كې وركړي.