په چین کې د افغانستان او پاکستان د تاوتریخوالي کمولو خبرې پیل شوې

سرچینو د پنجشنبې پر ورځ( د وري دیارلسمه ) آریانا نیوز ته څرګنده کړې، چې د چین په اورومچي ښار کې د افغانستان او پاکستان ترمنځ خبرې رسماً پیل شوې دي.

د افغانستان اقتصاد وزیر دین محمد حنیف د دغو خبرو په اړه هیله څرګنده کړې او وایي؛ تمه ده، چې دا خبرې به د پاکستان او افغانستان ترمنځ روان تاوتریخوالی او شخړې پای ته ورسوي.

دغه راز د پاکستان بهرنیو چارو وزارت ویاند طاهر اندرابي ویلي، چې په دې خبرو کې لوړپوړي چارواکي ګډون لري.

نوموړي هغه ادعاوې رد کړې، چې ګواکې دا یوازې د ټیټې کچې خبرې دي.

اندرابي دا ډول راپورونه «ناسم» وبلل.

د چین بهرنیو چارو وزارت ویاندې ماو نینګ ټینګار کړی، چې افغانستان او پاکستان د چین ګاونډیان دي او بېجینګ د خبرو اترو او مذاکراتو له لارې د اختلافاتو د حل ملاتړ کوي.

هغې زیاته کړې، چې چین په فعاله توګه د افغانستان او پاکستان ترمنځ د منځګړیتوب هڅې تر هغې روانې ساتي، د دواړو لوریو ترمنځ تاوتریخوالی کم او اړیکې ښې شي.

اسلام‌آباد هم تائید کړې؛ یو پلاوی یې اورومچي ته استولی او یو ځل بیا یې خپل پخوانی دریځ تکرار کړی، چې افغانستان باید د وسله‌والو ډلو په اړه د پاکستان امنیتي اندېښنې حل کړي. دا هغه ادعا ده، چې اسلامي امارت پر ځلونو رد کړې او پاکستان یې د خپل کورني امنیت مسوول بللی دی.