سیمه ییز خبرونه
په ښارونو او واټونو كې پتې او نښې لگول يوه ستره اړتيا ده
افغان بيسيم مخابراتي شركت ژمنه كړې، چې په شمالي سالنگ كې تر پلخمري ښار پورې د سړك دواړو خواوو ته لارښودې نښې او لوحې ولگوي.
ويل كيږي، چې دا تصميم د بغلان والي او افغان بيسيم مخابراتي شركت د رييس امين رامين له كتنې وروسته نيول شوى دى.
د افغان بيسيم مخابراتي شركت په هېواد كې د اړيكو په برخه كې پرخدمتونو سربېره له څو كلونو راپديخوا د مركز او ولايتونو د ښارواليو په همكارۍ توانيدلى، چې د هر ښار د واټونو او كوڅو پتې او لوحې ولگوي او خلك له سرگردانۍ وژغوري.
د افغان بسيم مخابراتي شركت رييس امين رامين د بغلان له والي سره په كتنه كې ژمنه كړې، چې له شمالي سالنگ څخه تر پلخمري ښار پورې د دغه ولايت د ښاروالۍ په همكارۍ د سړك دواړو خواوو ته ترافيكي نښې او لوحې ولگوي.
د بغلان والي سلطان محمد عبادي د موټر چلوونكيو لپاره د نښو نصبول اړين كار گڼي.
د بغلان ښاروال سيد مقصود سادات په پلخمري ښار كې د نښو او لوحو د نصبولو له كبله له افغان بيسيم مخابراتي شركت څخه د مننې په ترڅ كې وايي، چې په دې برخه كې له دغه شركت سره همكارۍ ته چمتو دي.
پر سړكونو ترافيكي نښې د ترافيكو د تنظيم يوه لويه اړتيا بلل كيږي، چې بدبختانه په هېواد كې ډېر سړكونه دا ډول نښې نه لري، چې د موټر چلوونكيو او خلكو لپاره ستونزې رامنځته كوي.
د افغان بيسيم مخابراتي شركت له څو كلونو راپديخوا له ښارواليو سره په دې برخه كې اغېزمن گامونه اخيستي دي.