تازه خبرونه
په کندهار کې ۸۲ طالب جنګیاليو ته مرګ و ژوبله اوښتې – دفاع وزارت
(Last Updated On: سلواغه ۱۰, ۱۳۹۹)
د افغانستان دفاع وزارت په سویلي ولایت کندهار کې د پیل شویو عملیاتو پر مهال طالب جنګیالیو ته له مرګ و ژوبلې اړولو خبر ورکړی دی.
د یاد وزارت په خبرپاڼه کې راغلي؛ افغان ځواکونو پرون د کندهار ولایت په ډنډ او ارغنداب ولسوالیو کې ځمکني او هوایي عملیات پیل کړي، چې د یادو ولسوالیو په ځلاخان او کوهک، ناګهان، جیلاهور او هدیره په اړوند سیمو کې لږ تر لږه ۶۰ وسلوال طالبان وژل شوي او ۲۲ نور ټپیان دي.
په یادو عملیاتو کې د وسلوالو طالبانو ۴ موټر او یو شمېر وسلې او مهمات هم له منځه وړل شوي دي.
په خبرپا ڼه کې راغلي: دغه راز د طالبانو ۶۳ کړۍ ماینونه، چې د دې ولایت په ژیرۍ، ارغنداب او میوند ولسوالیو کې د ملکي وګړیو او پوځي پرسونل د وژلو لپاره ځای پر ځای شوي وه؛ د ۲۰۵ اتل قول اردو د انجینرۍ ډلې کشف او شنډ کړي دي.
طالبانو تر دې دمه پدې اړه څه ندي ویلي.