تازه خبرونه
په کندوز کې د طالبانو د هاوان پر برید ۱۳ کسانو ته مرګ و ژوبله اوښتې
د افغانستان دفاع وزارت نن (پنجشنبه د لړم ۲۹) څرګنده کړې، چې د کندوز په ښار کې د طالبانو د هاوان پر برید د ښځو او ماشومانو په ګډون اووه عام وګړي وژل شوي او شپږ نور ټپیان دي.
د افغانستان دفاع وزارت په ډاګه کړې، چې طالبانو د تاوتریخوالي له ډېرېدو سره د ملکي تلفاتو کچه هم لوړه کړې ده.
د ۲۱۷ پامیر قول اردو د څرګندونو له مخې؛ طالبانو تېره شپه د کندوز ښار د تلوکه د کلي پر اړوند کورونو هاوان مرمۍ توغولي، چې یاده مرګ و ژوبلې یې اړولې ده.
وسلوالو طالبانو تر دې دمه رسنیو ته څه ندي ویلي.
په افغانستان کې د ملګرو ملتونو مرستندویه پلاوي (یوناما) ویلي، چې د ۲۰۲۰ کال په لومړیو څلور میاشتو کې د ۱۵۰ ماشومانو په ګډون له روانې جګړې ۵۰۰ ملکي وګړي وژل شوي دي.
یوناما ويلي، چې د افغانستان په جګړو کې ملکي وګړي درانده زیانونه ویني.
یوناما د ځاني زیانونو د ۳۹ سلنې پړه پر طالبانو، د ۱۳ سلنې پر داعش او د پاتې نورو هغه پر دولت ضد وسلوالو ډلو وراچوي.