په ۲۰۱۲م كال كې پر نړيوالو سرتېرو د طالبانو بريدونه لږ نه ول- جيمي گريبيل

په افغانستان د نړيوالو سرتېرو په وړاندې د وسلوالو طالبانو بريدونه په ۲۰۱۱ او ۲۰۱۲ ميلادي كالونو كې يو ډول ول.

له دې وړاندې  آيساف ويلي ول،  چې په ۲۰۱۲م كال كې د ۲۰۱۱ م كال په پرتله په افغانستان كې پر نړيوالو سرتېرو د وسلوالو طالبانو بريدونه اووه په سلو كې لږ شوي دي.

په افغانستان كې نړيوالو ځواكونو د ۲۰۱۲م كال په پاى كې داسې ارقام وړاندې كړل، چې له مخې يې د ۲۰۱۱م كال په پرتله پر دغو ځواكونو د وسلوالو مخالفينو په بريدونو كې اووه په سلو كې لږوالى ښكاريده. اوس نړيوال ائتلاف وايي، چې مخكې خپاره شوي ارقام ناسم ول.

په افغانستان كې د ائتلاف ځواكونو يو وياند جيمي گريبيل وايي، چې د معلوماتو په مخزن كې د هغو سيمو رپوټونه نه ول ځاى په ځاى شوي، چې په دې وروستيو كې يې امنيتي چارې افغان امنيتي ځواكونو ته سپارل شوې دي.

د كورنيو چارو او دفاع وزارتونه د دغه رپوټ په اړه له څه ويلو ډډه كوي.

جيمي گريبيل وايي، چې:

ورستۍ څېړنو وښوده، چې ځنې معلومات نا سم ول، د افغان پوځيانو يو شمېر ځانگړي عمليات په دغه معلوماتو كې نه ول حساب شوي. دا يوه كاري ستونزه ده او د افغانستان د جگړې په اړه د چارواكو اساسي ارزونه نه شي بدلولى.

له دې وړاندې ائتلافي ځواكونو ټينگار كړى، چې دوى په افغانستان كې د وسلوالو طالبانو پر ضد په جگړه كې پر مثبت لوري روان دي.

پوځي كارپوه جنرال امر الله امان په دې باور دى، چې د افغان او نړيوالو ځواكونو تر منځ په همغږۍ كې ستونزې موجودې دي.

دا په داسې حال كې ده، چې له ۲۰۰۱ م كال څخه تر ۲۰۱۲م كال پورې پر نړيوالو ځواكونو د وسلوالو طالبانو په بريدونو كې  شاوخوا دوه زره امريكايي سرتېري وژل شوي دي.