تازه خبرونه
پولیسو د کابل په دشت برچي سیمه کې د چاودنې پر تور یو کس نیولی
کابل پولیسو ویلي؛ د تېرې پنجشنبې پر ورځ( د مرغومي یوویشتمه ) ماسپیښین مهال د غلو یوې ډلې د کابل د دشت برچي د یوه سوداګریز مارکیټ مخې ته د لاسي بم برید تر سره کړ.
د کابل پولیسو ویاند خالد ځدراڼ په ایکس پاڼه کې لیکلي؛ په دې چاودنه کې دوه ملکي هېوادوال شهیدان شوي وه ۱۲ نور ټپیان دي.
د نوموړي د څرګندونو له مخې؛ دغو غلو غوښتل، چې د یاد مارکیټ مخې ته د ګډوډي پر جوړولو غلا وکړي؛ خو امنیتي ځواکونو نه یوازې د غلو د غلا پلان شنډ کړ، بلکې د کشفي او اپراتیفي څارنې په بېلابېلو عملیاتو کې یې بم اچوونکی، چې سید مصطفی نومیږي له یوه بل تورن کس سره په زخمي حالت کې ونیول او په عملیاتو کې د دوی یو بل ملګری د متقابلو ډزو په پایله کې ووژل شو.
کابل پولیسو دا هم څرګنده کړې، چې د پېښي څېړنه او څارنه اوس هم روانه ده.