ځانمرګي په کندوز کې ۶ سرتېري وژلي

نن له غرمې وروسته د کندوز ښار په سه درک سیمه کې ځانمرګی برید رامنځته شوی، چې په کې ۶ سرتېري وژل شوي او لس سرتېري او اووه ملکي وګړي ټپیان دي.

په ولسي جرګه کې د کندوز استازيو ویلي، چې دغه برید د افغان امنیتي ځواکونو یوې پوستې ته نږدې رامنځته شوی دی.

په ولسي جرګه کې د کندوز د خلکو استازې نیلوفر کوفي ویلي؛ د پوستې شپږ سرتېري په دې چاودنه کې وژل شوي او بیا  وروسته یوه بله چاودنه هم رامنځته شوې ده.

د کندوز د حوزوي روغتون رییس نعیم منګل وايي له دې پيښې څلور مړي او ۱۷ ټپيان روغتون ته لیږدول شوي دي.

محلي مسوولین وايي، امنیتي ځواکونه د وسلوالو د یوه برید د مخنیوي په موخه په دې سیمه کې راټول شوي وه، چې د یوه ماشوم له خوا پرې ځانمرګی برید وشو.

د پېښې د لیدونکیو په وینا، بریدګر ځان د لویې لارې د لومړي ټولي د قومندانۍ په مخکې الوځولی دی.

کندوز ښار د شنبې پر ورځ( د وږي ۹ / د اګست ۳۱ ) د ساعتونو لپاره د افغان ځواکونو او طالب وسلوالو ترمنځ د جګړې ډګر و او د ورځې په پای کې، طالب ځانمرګي د ښار په زړه کې پر افغان ځواکونو برید ترر سره کړ، چې په کې  شل پوځیانو او پېنځه ملکیانو ژوند له لاسه ورکړی دی.

کندوز د افغانستان په شمال کې یو له ناامنه ولایتونو څخه دی، چې په یو شمېر ولسوالیو او ښاري سیمو کې یې طالبان پراخې هڅې تر سره کوي