بی بی سی پښتو
ځلا ځاځۍ: په جبري توګه له خوسته بدله شوې یم؛ امنیتي ستونزې هسې پلمه ده
د خوست ولایت د جنايي جرمونو پر وړاندې د مبارزې مدریت د دفتر امره ځلا ځاځۍ له بي بي سي سره په یوه ځانګړې مرکه کې وايي، په جبري توګه په خوست کې له خپلې دندې کابل ته بدله شوې ده، او تر اوسه د راتلونکې دندې په اړه ورته څه نه دي ویل شوي.
هلته د خوست امنیتي چارواکي وايي، اغلې ځاځۍ یې کابل ته د تګ را تګ پر مهال د ترور له خطره د ژغورلو، او د خوست-کابل پر لاره د امنیتي ستونزو له امله د کورنیو چارو وزارت د بشري حقونو د ریاست په غوښتنه کابل ته بدله کړې ده.
د خوست ولایت د قومندانۍ ویاند عادل حیدر په دې اړه بي بي سي ته وویل:
“ځلا ځاځۍ یوازې د لویو لارو د نا امنیو له امله او د دې د ترور د مخنیوي لپاره کابل ته لیږل دي.”
خو پخپله ځلا ځاځۍ چارشنبه ماښام بي بي سي ته وویل، امنیتي ستونزې هسې یوه پلمه ده، او دا خبره هم نه وه چې له خوست ولایته بدله شوې ده.
نوموړې وايي، تیره اوونۍ یې غوښتل چې د خوست امنیه قومندانۍ ته دننه شي خو وايي، د ننه تګ اجازه نه ده ورکړل شوې. اغلې ځاځۍ وايي:
“که چیرې کورنیو چارو وزارت رښتیا زما د امنیت په اړه اندېښنه لري نو ولې یې تېره اونۍ قومندانۍ ته د تګ اجازه نه راکوله. د قومندانۍ په مېلسمتون کې اوسېدم او تر مازدیګره یې له مېلمستونه د وتلو مکتبوب هم را کړ او له دندې یې وشړلم”.
افغان ملي پولیسو کې سلګونو ښځینه پولیسو دندې پیل کړې
په کندهار کې ښځينه پوليس ډېر شوي دي
د افغان پولیسو یوازې یو ٪ ښځې دي
وړاندې د ځلا ځاځۍ له دندې د لېرې کېدو په اړه داسې راپورنه هم خپاره شول چې ګواکې د دندې لپاره نه حاضریده، خو اغلې ځاځۍ دا تور ردوي او وايي، د ځايي چارواکو په مشوره څو ورځې دفتر ته نه وه تللې.
نوموړې بي بي سي سره خبرو کې وویل، د بدلېدو اصلي دلیل یې دا دی چې په خوست کې ولایتي چارواکو او ان پارلمان کې د خوست ځینو وکیلانو هلته د دې له شتون سره ستونزه درلوده.
اغلې ځاځۍ وایي، خوست کې یې د دندې پر مهال ښځې په ډاډه زړه دفتر ته ورتللې او خپلې ستونزې یې ورسره شریکولې، او همدا خبره د ځایي دود له مخې ځینو خلکو ته د منلو نه وه.
ځلا ځاځۍ نږدې درې میاشتې وړاندې په خوست کې د جنايي جرمونو د دفتر امره ټاکل شوې وه، چې هغه وخت یې ټاکنې بېلا بېل غبرګونونه را پارولي وو.
ځینو یې ګومارل غندل خو ځینو نورو یې ملاتړ کاوه.
دوهم څارن ځلا په ترکیې هېواد کې د پولیسو لنډمهاله زده کړې کړې دي او تر دې وړاندې یې دې برخه کې کاري تجربه نه درلوده.
