چین امیر خان متقي ته د سفر بلنه ورکړه

د افغانستان لپاره د چین ځانګړي استازي یو شیاویونګ د اسلامي امارت بهرنیو چارو وزارت چارسمبالي امیر خان متقي سره وکتل او دواړو خواوو د افغانستان او چین ترمنځ د سیاسي اړیکو او اقتصادي همکاریو د پراختیا په اړه خبرې وکړې.

د بهرنیو چارو وزارت په رسنیزه خبرپاڼه کې راغلي، چې د چین ځانګړي استازي د نړیوالې ټولنې پر کچه له افغانستان څخه د ملاتړ اعلانولو تر څنګ امیر خان متقي ته بلنه ورکړه، چې د روانې میاشتې تر پایه بیجینګ ته سفر وکړي.

په دې کتنه کې، دواړو خواوو د دواړو هېوادونو ترمنځ د سیاسي او اقتصادي اړیکو د پراختیا په اړه خبرې کړې دي.

د بهرنیو چارو وزارت د عامه اړیکو مشر ضیا احمد تکل وايي، چې امیر خان متقي د چین له دوامداره ملاتړ څخه مننه څرګنده کړه او د دواړو هېوادونو ترمنځ د اقتصادي اړیکو پرمختګ یې وستایه.

ضیا احمد تکل زیاته کړې؛ د افغانستان لپاره د چین ځانګړي استازي په داسې حال کې، چې په نړیواله کچه یې د افغانستان ملاتړ څرګند کړ؛ امیر خان متقي ته یې د دې میاشتې په پای کې د بیجینګ د سفر بلنه ورکړه.

د چین ځانګړي استازي د بهرنیو چارو وزارت چارسمبالي امیر خان متقي ته د بیجینګ رسمي سفر بلنه ورکړه

د بهرنیو چارو وزارت چارسمبالي د چین بلنه منلې ده.

کارپوهان پدې باور دي، چې د کابل او بیجینګ ترمنځ د اقتصادي او سیاسي اړیکو پراخول په داسې وخت کې مهم دي، چې افغانستان د لویدیځ تر بندیزونو لاندې دی.

چین اوس‌مهال یوازنی هېواد دی، چې په رسمي ډول یې د اسلامي امارت سفیر منلی دی او دې هېواد تل د افغانستان په اړه په نړیوالو غونډو کې په ځانګړي توګه د ملګرو ملتونو د امنیت شورا په غونډو کې د افغانستان د بهرنیو اسعارو د زیرمو د خلاصون غوښتنه کړې او وایي، چې دا هېواد د نړیوالې ټولنې ملاتړ ته اړتیا لري.