ډیسانایاکه له مارکسیسټي غوښتنو سره د سریلانکا ولسمشر شو

د مارکسیسټت پلوه خلکو د آزادۍ جبهې مشر آنورا کومارا ډیسانایاکه د سریلانکا نوی ولسمشر وټاکل شو او ژمنه یې وکړه، چې هېواد به د بدلون او ملي یووالي پر لوري راکاږي.

د سریلانکا ټاکنو کمیسیون اعلان کړی، چې د خلکو د ازادۍ جبهې او د ملي خلکو د ځواک ټولنې مشر ۵۵ کلن آنورا کومارا ډیساناکه د ۴۲ اعشاریه ۳۱ سلنه رایو پر ترلاسه کولو د دې هېواد ولسمشر شوی دی.

ټاکنې د شنبې پر ورځ ترسره شوي او د اپوزیسیون مشر ساجیټ پرماډاسا د ۳۲ اعشاریه ۷۶ سلنې رایو په دوه‌یم ځای کې راغلی. اوسنی ولسمشر رانیل ویکرماسنګهـ د ۱۷ اعشاریه ۲۷ سلنه رایو پر ترلاسه کولو درېیم ځای خپل کړی دی.

دا لومړی ځل دی، چې په سریلانکا کې د ولسمشرۍ ټاکنې د رایو په دوه‌یم پړاو کې ترسره کیږي؛ ځکه، چې هیڅ یو نوماند هم ونشو کړای ۵۰ سلنه رایې وګټي.

تمه ده، چې ډیسانایاکه به د دوشنبې پر ورځ (د تلې دوه‌یمه) د کولمبو د ولسمشرۍ په ماڼۍ کې لوړه وکړي.

ډیسانایاکه په خپله لومړۍ وینا کې د سریلانکا د ټولو توکمونو د سنګالیانو، ټامیلانو او مسلمانانو ګډون د یووالي غوښتنه وکړه.

هغه ویلي: د ادبي او کلتوري نويوالي پېر به له یووالي او ګډ لید څخه پیل شي.

هغه زیاته کړې: هغه خوب، چې مونږ له پېړیو راپدېخوا درلود؛ اوس پر رښتیا بدلیږي. دا بریا د ځانګړیو فردي هڅو پایله نده، بلکې ستاسې د ګډو هڅو پایله ده. دا بریا زمونږ د ټولو ده.

د سریلانکا کړکېچن اقتصاد د ډیسانایاکه د ټاکنیز کمپاین بنسټیزه غوښتنه او لومړیتوب و. هغه ژمنه کړې، چې د خلکو د وضعیت د ښه کولو او د پیسو د نړیوال صندوق پر اړوند پالیسیو د بیا کتنې لپاره به هڅې ترسره وکړي.