د کابل په شش درک سیمه کې د دوشنبې پر سهار اته بجې(د غویی۱۰) دوه غبرګو چاودنو د کابل شنه سیمه ولړزوله، چې لږ تر لږه یې د ۲۵ کسانو خوږ ژوند واخیست او له۴۰ ډېر کسان یې ټپیان کړل.

له راپورونو سره سم لومړی د شش درک پر سړک د ملي امنیت یوې پوستې ته نږدې د موترسایکل په کارولو ځانمرګی برید وشو، چې له کبله یې څلورو کسانو خپل خوږ ژوند له لاسه ورکړ او یو شمېر نور ټپيان شول؛ خو وروسته، چې د ټپيانو او جسدونو د انتقال لپاره سیمې ته امنیتي ځواکونه، ځان ژغورونکي او ژورنالیستان ورسیدل، دوه یمه چاودنه وشوه، چې په کې د خبریالانو په ګډون عامو خلکو ته درنده مرګ و ژوبله ورسیده.

د عامې روغتیا وزارت ویاند وحیدالله مجروح وایي: په دې چاودنو کې لږ تر لږه ۲۱ کسانو خپل خوږ ژوند له لاسه ورکړی او ۲۷ نور ټپیان دي.

د نوموړي په وینا؛ د دواړو چاودنو د ډېرو ټپیانو روغتیایي حالت د اندېښنې وړ دی.

د نی اجرئیه رییس مجیب خلوتګر د څرګندونو له مخې؛ په دوه یمه پېښه کې ۸ خبریالانو ژوند له لاسه ورکړی دی، چې یو په کې د فرانس پریس آژانس انځورګر خبریال شاه مری فیضي، د یک تلویزون خبریال غازي رسولي، د آزادۍ رادیو خبریال عبادالله حنانزي، د ژوندون تلویزون خبریال توخي، د طلوع نیوز یوه عکاس او ځیني نور خبریالان په ټپیانو او وژل شویو کې یاد شوي دي.

دغه راز د خبریالانو فیدراسیون د سباوون کاکړ وژل کیدل هم تائید کړي، چې ټول ۹ خبریالانو په دې دواړو پېښو کې ژوند له لاسه ورکړی دی. دغه راز د یو پرېکړه لیک په لوستلو یې دغه پېښه وغندله، د غویی لسمه یې خونړۍ ورځ ونوموله او د می په درېیمه یې د دغو قربانیانو د فاتحې ورځ اعلان کړه.

کورنیو چارو وزارت خپاره شوي ځاني زیانونه منلي او وایي، چې د لومړني برید ګر موخه په سیمه کې د امنیتي ځواکونو د ګنډونکیو خونه وه؛ خو دوه یم بریدګر د خبریالانو په جامه کې پر عامو خلکو او خبریالانو ځانته چاودنه ورکړې ده.

سرچینې زیاته کړې، چې په لومړۍ چاودنه کې څلور امنیتي ځواکونو هم خپل ژوند له لاسه ورکړی دی.

د کابل پولیسو ویاند حشمت ستانکزي هم د ۲۱ کسانو وژل کیدل منلي او وایي، چې له ۴۰ ډېر کسان په دواړو ځانمرګو بریدونو کې ټپیان شوي دي.

نوموړي دغه راز ویلي، چې په لومړۍ چاودنه  کې بریدګر یو موتر سایکل کارولی دی.

هغه دغه راز د دوه یمې چاودنې رامنځته کیدل هم منلي؛ خو وایي، چې د دې چاودنې بڼه تر دې دمه څرګنده شوې نه ده.

ویل کیږي، چې دوه یمه چاودنه هغه مهال رامنځته شوه، چې خبریالان او عام وګړي د پېښې ځای ته نږدې راټول شوي وه.

د ځینو بهر نیو رسنیو د څرګندونو له مخې؛ د دواړو پېښو مسوولیت داعش پرغاړه اخیستی دی.