تازه خبرونه
له بشردوستانه کارونو څخه د ښځو منع کول د ټولو افغانانو لپاره ناوړه پایلې لري – مرستندویه ادارې
د بشردوستانه چارو لپاره د ملګرو ملتونو د عمومی منشي مرستیال مارتین ګریفیتس او د یو شمېر مرستندویه موسسو رییسانو په یوه ګډه اعلامیه کې له اسلامي امارته غوښتي، چې په پوهنتونونو او نادولتي موسسو کې د ښځو د ورتګ د منع کولو پرېکړه بېرته واخلي.
په اړوند اعلامیه کې راغليګ له بشري کارونو څخه د ښځو منع کول د ټولو افغانانو لپاره د ژوند ګواښونکي پایلې لري. اوسمهال ځینې حساس پروګرامونه د ښځینه کارکوونکیو د نشتوالي له کبله په لنډمهاله توګه بند دي.
د ملګرو ملتونو په اعلامیه کې راغلي: مونږ نشو کولی عملیاتي محدودیتونه له پامه وغورځوو، چې مونږ اوس د مرستې ټولنې په توګه ورسره مخ یوو. مونږ به هڅه وکړو، چې خپلې ژغورونکې هڅې روانط وساتو؛ خو داسې ښکاريو چې ډيري فعالیتونه به ودریږي، ځکه مونږ نشو کولی د ښځو له مرستې پرته اړینې بشري مرستې چمتو کړو.
د ښځینه مرستندویه کارکوونکیو د کار مخنیوی په داسې وخت کې کیږي، چې په افغانستان کې له ۲۸ میلیون ډېر خلک د ژوندي پاتې کیدو لپاره مرستو ته اړتیا لري.
دا اعلامیه د لاتندې بنستونو د مشرانو لخوا لاسلیک شوې ده:
د ملګرو ملتونو د ماشومانو وجهي صندوق (یونیسف)
د خواړو نړیوال پروګرام
د روغتیا نړیواله ټولنه
د ملګرو ملتونو پراختیايي پروګرام
د امریکا او جاپان په ګډون د یوولس اروپايي او غیر اروپايي هېوادونو د بهرنیو چارو وزیران له افغان حکومته غواړي، چې د پوهنتونونو د ځنډولو پرېکړه بېرته واخلي او په کورنیو او بهرنیو ادارو کې د ښځو پر کار کولو بندیز لرې کړي.
د دغو هېوادونو د بهرنیو چارو وزیرانو په یوه ګډه اعلامیه کې ویلي، چې دا پرېکړه د هغو میلیونونو افغان کورنیو ژوند له خطر سره مخ کوي، چې بشري مرستو ته اړتیا لري.
د دوی په وینا؛ دا کړنه له نړیوالې ټولنې سره د افغانستان د واکمنو چارواکو د اړیکو د عادي کولو لپاره نه لېوالتیا ښيي.
د آمريکا، استراليا، کانادا، دنمارک، فرانسې، جرمني، ايتاليا، ناروې، سويس، هالند، بريتانيا، جاپان او د اروپايي ټولنې د استازيو او بهرنيو چارو وزيرانو په يوه ګډه اعلاميه کې د افغانستان له حکومت غوښتنه شوېو چې د ښځو او نجونو د کار او زدکړې د بندېدو پر پرطکړه له سره غور وکړي.
په دې ګډه اعلامیه کې ویل شوي چې: په غیر دولتي او نړیوالو موسسو کې د ښځو د کار بندیز پر میلیونونه افغانان، چې بشري مرستو ته اړتیا لري له خطر سره مخ کوي. مونږ له لنډمهالي حکومت څخه غوښتنه کوو، چې ژر تر ژره دې پخپله پرېکړه له سره غور وکړي. مونږ د افغانانو د دې غوښتنې ملاتړ کوو، چې نجونې او میرمنې کار، ښوونځي او پوهنتون ته راستانه شي او د بشري مرستو او لومړنیو اړتیاوو په برابرولو کې اړین رول ولوبوي او مونږ له واکمنو چارواکو څخه غوښتنه کوو، چې د سیاسي، اقتصادي، ټولنیز درناوي او د ښځو او نجونو حقونو ته د رسیدو لپاره د هغو درناوی وکړي.
د دغو هېوادونو د بهرنیو چارو وزیرانو ټینګار کړی، چې په افغانستان کې واکمن چارواکي له نړیوالې ټولنې سره د دوستانه او عادي اړیکو لرلو ته لېوالتیا نه ښيي.
په اعلامیه کې دا هم ویل شوي، چې دا ټول هېوادونه له ملګرو ملتونو سره په نږدې اړیکه کې دي.
د ملګرو ملتونو د عمومي منشي د استازولې دفتر (یوناما) هوکړه کړې، چې د ټولو نړیوالو بسپنه ورکوونکیو په استازیتوب کار وکړي، چې لنډمهالی حکومت ژر تر ژره خپله پرېکړه بېرته واخلي.
د امریکا د بهرنیو چارو وزیر هم په یوه تویت کې ویلي، چې امریکا د افغانستان د وضعیت په اړه له خپلو ټولو متحدینو او همکارانو سره ژمنه ده.
هغه له حکومته وغوښتل؛ هغه خطرناک حکم لغو کړي، چې په غیر دولتي او نړیوالو موسسو کې ښځې له کار کولو منع کوي.
د اسلامي امارت لخوا له اړوند پرېکړې وروسته په افغانستان کې شاوخوا نیمايي بشري سازمانونو او بنسټونو خپل کارونه بند کړي دي.
دا په داسې حال کې ده، چې د لوړو زدکړو وزارت تېره اوونۍ په یوه مکتوب کې دولتي او خصوصي پوهنتونونو ته امر کړی، چې د کابینې د پرېکړې له مخې دې د نجونو زدکړې تر راتلونکې خبرتیا پورې وځنډوي.
د لوړو زدکړو وزیرحجاب نه اغوستل، له شرعي محرم پرته سفر کول، د نجونو د لیلیې فعالیت او د نجونو او هلکانو مخلوط ټولګي په پوهنتونونو کې د نجونو د زدکړو د ځنډولو لاملونه یاد کړي دي.
تازه خبرونه
په سمنګان ولايت کې د يوې ترافيکي پېښې له کبله ۲۹ کسانو ته مرګ او ژوبله اوښتې
د سمنګان ولایت د امنيه قومندانۍ مطبوعاتي دفتر ويلي؛ د دغه ولايت په دره صوف ولسوالۍ کې د يوې ترافيکي پېښې له کبله ۵ کسان مړه شوي او ٢٤ نور ټپيان دي.
د سمنګان امنيه قومندانۍ زياته کړې؛ دا پېښه نن – پنجشنبه د غویی دیارلسمه) له غرمې مخکې يوولس بجې هغه مهال رامنځته شوه، چې یو اینو ډوله موټر د بلخ او دره صوف ولسوالۍ ترمنځ له سرک واوښت.
د دغې سرچنې د څرګندونو له مخې؛ ټپيان د دره صوف ولسوالۍ روغتون ته لېږدول شوي.
دغه راز څرګندوي؛ د درې ټپیانو روغتيايي حالت د اندېښنې وړ دى، چې د بلخ حوزوي روغتون ته لېږدول شوي دي.
د دغې پېښې لامل د موټر تخنیکي ستونزې یادې شوې دي.
تازه خبرونه
داعش له تېرو دوه میاشتو راپدیخوا ۱۵۴ کسانو ته مرګ او ژوبله اړولې ـ راپور
په افغانستان کې د ملګرو ملتونو مرستندویه پلاوي دفتر د “افغانستان د بشري حقونو وضعیت” تر سرلیک لاندې په خپل درې میاشتني راپور کې د ښځو او نجونو، د رسنیو د ازادۍ، خپلسري نیولو، د جسمي مجازاتو او اعدام په اړه اندېښنه څرګنده کړې ده.
یوناما د پنجشنبې پر ورځ – د غویی دیارلسمه – په افغانستان کې د بشري حقونو د وضعیت په اړه د ملګرو ملتونو د امنیت شورا پر سپارښتنه یو راپور خپور کړ، چې په د دغو بریدونو له کبله تر ډېره شیعه افغانان له مرګ او ژوبلې سره مخ شوي دي.
د یوناما په راپور کې راغلي، چې د روان کال له جنورۍ څخه تر مارچ پورې په افغانستان کې د داعش د بریدونو له کبله لږ تر لږه ۳۶ کسان وژل شوي او ۱۱۸ نور ټپیان دي.
د دغه راپور له مخې؛ د جنورۍ له شپږمې څخه تر یوولسمې پورې په کابل ښار کې د لاسي بمونو درې چاودنو لږ تر لږه ۷۹ ملکي وګړو ته مر او ژوبله اړولې ده.
د یوناما د څرګدونو له مخې؛ د جنورۍ پر شپږمه د کابل د دشتبرچي سیمې په یوه مسافر وړونکي بس کې د ماین د چاودنې له کبله پېنځه ملکي وګړي ووژل شول او شل نور ټپیان دي.
دغه راز د جنورۍ پر نهمه د کابل په الوخېل سیمه کې د افغانستان د محبسونو ریاست د کارکوونکیو پر موټر د ځای پر ځای شوي ماین د چاودنې له کبله ۳ تنه وژل شوي او ۱۳ نور پیان شول.
په دې راپور کې راغلي؛ د جنورۍ پر یوولسمه هم د کابل د دشتبرچي اړوند په یوه سوداګریز مارکیټ کې د چاودنې له کبله، چې بڼه یې تر اوسه معلومه نده درې کسان وژل شوي او ۳۵ نور ټپیان دي.
راپور د هم څرګندوي، چې د دغو بریدونو په قربانیانو کې د نرینهوو په ګډون ښځې او ماشومان هم شته.
د یوناما د موندنو له مخې؛ په کندهار کې د کابل بانک د دفتر مخې ته په برید کې ۲۵ کسان ووژل شول او ۵۰ نور ټپیان دي. دا برید د مارچ پر یوویشتمه رامنځته شوی، چې د دې برید پړه هم داعش منلې ده.
باید وویل شي، چې له مارچ راوروسته کابل او هرات د داعش د بریدونو شاهدان ول.
دغه راز په یوه تازه پېښه کې د دوشنبې پر ورځ – د غویی لسمه د داعش وسلهوالو د هرات ګذرې ولسوالۍ د شیعهګانو د جومات پر لمونځ کوونکیو برید وکړ، چې د ښځو او ماشومانو په ګډون یې شپږ کسن ووژل او یو بل ټپي شو.
په دغه راپور کې یوناما د ښځو او نجونو، د رسنیو د ازادۍ د وضعیت او په خپل سر نیول او توقیف، د جسمي مجازاتو او اعدام په اړه اندېښنه ښودلې او ویلي یې دي، چې د بښنې له اعلان سره – سره؛ د افغان حکومت د پخوانیو کارکوونکیو پر وړاندې ګواښونه روان دي. د یوناما د دغه راپور په یوه بله برخه کې راغلي چې د مارچ په اتلسمه په خوست ولایت کې د پاکستان په هوايي بریدونو کې یو کس وژل شوی او دوه نور ټپیان دي او دغه راز په پکتیکا ولایت کې اووه ملکي وګړي وژل شوي دي.
اسلامي امارت دغه راپور بې بنسټه بولي او څرګندوي، چې د یوناما راپورونه تکراري، له پروپاګند څخه ډک او له اسنادو پرته دي؛ځکه، چې په هېواد کې د ښځو او نرینهوو حقونه خوندي دي.
د اسلامي امارت ویاند ذبیح الله مجاهد زیاته کړې، چې رسنۍ د هېواد د قوانینو او ملي ارزښتونو په نظر کې نیولو سره فعالیت کوي او د پخوانیو دولتي کارکوونکیو پر وړاندې هیڅ ډول ګواښ نشته.
د ملګرو ملتونو د بشري حقونو شورا په افغانستان کې د بشري حقونو وضعیت کړکېچن بللی او په هېواد کې یې د بشري حقونو په ځانګړي توګه د ښځو د حقونو د خوندیتوب غوښتنه کړې، چې اسلامي امارت یې بې بنسټه بولي.
د داعش د بریدونو د قربانیانو دغه شمېر په داسې حال کې وړاندې کیږي، چې اسلامي امارت په افغانستان کې د داعش ډلې فزیکي شتون رد کړی او څرګندوي، چې دغه ډله ځپل شوې ده.
تازه خبرونه
د دفاع وزارت چارسمبالي د آذربایجان له سفیر سره وکتل
د ملي دفاع وزارت چارسمبالي محمد یعقوب مجاهد د چارشنبې پر ورځ د غویی پر دولسمه په کابل کې د آذربایجان سفارت له چارسمبالي سره د کتنې پرمهال ویلي؛ د سفارت بیا پرانستل د دواړو هېوادونو ترمنځ د اړیکو د ټینګښت لپاره یو مثبت ګام دی.
د ملي دفاع وزارت په خبرپاڼه کې راغلي، چې محمد یعقوب مجاهد ویلي: د دوه مسلمانو هېوادونو ترمنځ دوستي او مشترکات ډېر د ویاړ خبره ده.
محمد یعقوب مجاهد په کابل کې د آذربایجان د سفارت بیا پرانستل یو مثبت ګام یاد کړ او څرګندوي: د دې اوږدمهاله اړیکو د ټینګښت لپاره مونږ غواړو، چې په اقتصادي، سوداګریزو او نورو برخو کې همکارۍ ژر تر ژره پیل کړو.
د آذربایجان سفیر الهام محمدوف هم ویلي؛ مونږ چمتو یو، چې د اسلامي امارت او د دغه هېواد له خلکو سره د اړیکو د ټینګښت په برخه کې همکارۍ پراخې کړو.
-
تازه خبرونه5 days ago
د بغلان ولایت د غوري سمنټو تولید زیات شوی
-
سیمه ییز خبرونه2 days ago
په هر حال پر رفح برید شونی دی – نتانیاهو
-
سیمه ییز خبرونه4 days ago
د دوبۍ واکمن د هوایي ډګر د نوي ټرمینل جوړولو لپاره ۳۵ میلیارډ ډالر تصویب کړل
-
لوبی5 days ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
تازه خبرونه2 days ago
نړیوال بانک له افغانستان سره ۸۴ میلیون ډالر مرسته ومنله
-
لوبی2 days ago
افغانستان د ۲۰۲۴ کال ۲۰ اوریز نړیوال جام ته لوبډله اعلان کړه
-
تازه خبرونه4 days ago
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
-
تازه خبرونه5 days ago
له پاکستان څخه دې د افغان کډوالو د جبري ایستلو چټکتیا راکمه شي