د امریکا-اسلامي اړیکو شورا (CAIR) او د هغې د کالیفورنیا څانګې د امریکا د کانګرس د فرعي کمیټې په ګډه غونډه کې اسلام ضد څرګندونې او د افغانانو ملامتول پر کلکه غندلي دي.

دې بنسټ په یوه خبرپانه کې ویلي، چې د افغان کډوالو د پروګرام په اړه د امریکا د سنا د قضايي کمیټې غونډه د سیاسي بریدونو، د ناسمو تورونو خپرولو او د مسلمانانو د خدمت کوونکو ټولنو پر نښه کولو لپاره یوه مرحله ګرځېدلې ده.

د دغې خبرپاڼې له مخې؛ د غونډې په بهیر کې د امریکا-اسلامي اړیکو شورا پر وړاندې “بې بنسټه او بدناموونکي” تورونه ولګول شول او د مسلمانانو ضد نظرونو لرونکی یوه افراطي څېره د شاهد په توګه غونډې ته بلل شوې ده.

د امریکا-اسلامي اړیکو شورا ټینګار کړی؛ دا ډول څرګندونې د امریکایي مسلمانانو، افغان کډوالو او هغو بنسټونو د بدنامولو لپاره د پراخ کمپاین یوه برخه ده، چې د کډوالو او بشري حقونو په ځانګړي توګه له فلسطیني حقونو څخه ملاتړ کوي.

د امریکا-اسلامي اړیکو شورا مرستیال اډوارډ احمد میچل ویلي، چې یو شمېر سناتورانو له غونډې څخه د مهاجرینو، کډوالو او امریکایي مسلمانانو پر وړاندې د نفرت د راپارولو لپاره کار واخیست.

دغه راز د امریکا-اسلامي اړیکو د کالیفورنیا شورا اجرائیوي رییس دا غونډه “شرموونکې سیاسي ننداره” وبلله او زیاتوي، چې پر اغېزمنې پالیسۍ جوړونې او عامه خوندیتوب د تمرکز کولو پرځای؛ دا د افغانانو او مدني ټولنې ادارو د بدنامولو لپاره کارول شوې.

دا په داسې حال کې ده، چې له افغانستان څخه د امریکایي ځواکونو له وتلو وروسته لسګونه زره افغانان د ځانګړو پروګرامونو له لارې امریکا ته داخل شوي او د دوی د قانوني حیثیت او بیا میشتېدنې په اړه بحثونه روان ساتل شوي دي.

قطر د افغانستان په اړه د اسلامي همکاریو ټولنې د وزیرانو د اړیکې ډلې په لومړنۍ تخنیکي غونډه کې، چې د دې ټولنې د سعودي عربستان د جدې د مرکزي دفتر پر کوربتوب ترسره شوې؛ ګډون وکړ.

د غونډې استازیتوب د قطر بهرنیو چارو د وزیر د ځانګړي استازي د دفتر د لومړی منشي ډاکټر خالد عبدالعزیز الخلیفي پر غاړه و.

هغه په ​​خپله وینا کې ټینګار کړی؛ دا غونډه په یوه حساس پړاو کې ترسره کیږي او د افغانستان د وضعیت لپاره یوه داسې متوازن او ګډ چلند ته اړتیا ده، چې بېړنۍ بشري مرستې، مسوولانه سیاسي تعامل او د افغانستان د ځانګړو شرایطو درک د اسلامي همکاریو ټولنې د اصولو په چوکاټ کې سره یوځای کړي.

الخلیفي زیاته کړې؛ دا غونډه د تخنیکي ارزونو د تبادلې، د هڅو د همغږۍ او د عملي وړاندیزونو د ترتیب لپاره یو مهم فرصت دی، چې د افغانستان په اړه د اغېزمنو او همغږو اقداماتو لپاره د وزیرانو د اړیکې ډلې وړتیا پیاوړې کوي.

هغه د ملګرو ملتونو پر مشرۍ د “دوحې بهیر” کوربتوب ته هم نغوته(اشاره) وکړه او څرګندوي؛ دا اقدام د قطر د دې قوي باور پر بنسټ رامنځته شوی، چې د سولې د ترلاسه کولو لپاره ترټولو اغېزمنه لار رغنده خبرې اترې دي.

د هغه په وینا، د دوحې بهیر د افغانستان په اړه د نړیوالو هڅو یو مهمه لاسته راوړنه ده او د بېلابېلو لورو ترمنځ د خبرو اترو او همغږۍ لپاره یې یو واحد چوکاټ برابر کړی دی.

د قطر استازي زیاته کړې؛ د دوحې بهیر په درېیم پړاو کې د نشه‌یي توکو پر وړاندې د مبارزې او د خصوصي سکټور د رول په برخه کې دوه کاري ډلې جوړې شوې، چې موخه یې د افغانستان د چارسمبالي حکومت او نړیوالې ټولنې ترمنځ د عملي خبرو اترو جوړول او د هېواد بشري او پرمختیایي اړتیاوو ته لاسرسی دی.

ډاکټر الخلیفي هیله څرګنده کړې؛ دا غونډه به عملي او رغنده پایلې ولري، چې د اسلامي یووالي روحیه راوځلوي او د افغانستان په اړه د مسوولانه ګډ چلند لپاره لار اواره کړي.

د امریکا ولسمشر ډونالد ټرمپ له پولیټیکو مجلې سره د مرکې پر مهال په ایران کې د آیت‌الله علي خامنه‌یي د ۳۷ کلنې رهبرۍ د پای ته رسېدا غوښتنه راپورته کړې او څرګندوي: « اوس هغه وخت رارسېدلی، چې د ایران لپاره نوې رهبري ولټول شي.»

ټرمپ دا څرګندونې په داسې حال کې کړي، چې په ایران کې د پراخو اعتراضونو څپه له سختې ځپنې سره مخ کړې او راکمه شوې ده.

د امریکايي چارواکو د څرګندونو له مخې؛ د دغو اعتراضونو پر مهال زرګونه کسان وژل شوي، چې د امریکا ولسمشر یې پرله‌پسې د پوځي مداخلې ګواښونو ته اړ کړی و.

د امریکا ولسمشر ویلي، چې په ایران کې د پراخو اعدامونو درېدا او له ۸۰۰ څخه د زیاتو کسانو د اعدام لغوه کېدا د هغه د دریځ د بدلون پر پرېکړه اغېز لرلی دی.

ټرمپ زیاته کړې: « تر ټولو ښه پرېکړه، چې وشوه؛ د دغو اعدامونو درول ول.»

دا څرګندونې له هغې وروسته راپورته شوې، چې آیت‌الله خامنه‌یي په ایکس پاڼه کې د ټرمپ پر ضد توند پیغامونه خپاره کړل او هغه یې د ایران د تاوتریخوالي او ګډوډیو مسوول وباله.

د ایران رهبر په یوه پیغام کې لیکلي: « د امریکا ولسمشر د ایران ملت ته د اوښتو مالي او ځاني زیانونو مسوول دی.»

ټرمپ د ایران حکومت پر «بې‌سارې ځپنې او تاوتریخوالي» ولاړ وباله او وایي: «رهبري یعنې درناوی، نه وېره او مرګ. هغه هېواد، چې د زرګونو کسانو پر وژلو اداره کېږي؛ روښانه راتلونکی لرلی نشي.»

د امریکا ولسمشر همدارنګه د ایران رهبري «ناکامه» وبلله او زیاتوي، چې ایران د «کمزورې ادارې» له کبله د نړۍ د ژوندانه لپاره پر بدو سیمو اوښتی دی.

د واشنګټن او تهران ترمنځ د لفظي تاوتریخوالي زیاتېدا د سیمې لپاره یو حساس پړاو رامنځته کړی دی. په داسې حال کې، چې ایراني چارواکو تر اوسه د ټرمپ وروستیو څرګندونو ته رسمي غبرګون ندی ښودلی.