امنیتي سرچینو ویلي، چې نن له غرمې وروسته(دوشنبه د مرغومي نهه‌ویشتمه) د کابل ښار د لسمې ناحیې د ګل‌فروشۍ په اړوند کوڅه کې چاودنه رامنځته شوې، چې کبله یې یو شمېر کسانو ته مرګ او ‌ژوبله اوښتې ده.

د کابل پولیسو ویاند خالد ځدران په ایکس پاڼه  کې لیکلي، چې دا چاودنه په شهرنو سیمه کې رامنځته شوې ده.

د یوشمېر راپورونو له مخې؛ چاودنه د یوه رسټورانټ مخې ته شوې، خو نورو بیا ویلي، چې پېښه په یوه هوټل کې رامنځته شوې ده.

د ځدراڼ د څرګندونو له مخې؛ د دغې پېښې په اړه پلټنې پیل شوې دي.

د کابل ایمرجنسي روغتون څرګنده کړې، چې د شهر نو له چاودنې وروسته ۲۰ کسان روغتون ته راوړل شوي، چې اووه کسانو یې سا ورکړې ده.

یوې سرچینې آریانا نیوز ته تائید کړه، چې په چاودنه کې چینایي اتباع هم ټپیان شوي دي.

د ملي دفاع وزارت ویاند ویلي، چې د افغانستان د وسله‌والو ځواکونو لوی درستیز محمد فصیح‌الدین فطرت پرون پر یوه رسمي سفر قطر هېواد ته تللی او نن یې په دوحه ښار کې د «ډیمډیکس» نړیوال دفاعي نندارتون د پرانیستې په مراسمو کې ګډون کړی دی.

د ملي دفاع وزارت ویاند عنایت‌الله خوارزمي زیاته کړې؛ دغه نندارتون له ۲۰۰۸ راپدېخوا هر کال د قطر په پلازمېنه کې ترسره او د دفاعي سکټور له مهمو نړیوالو پېښو څخه شمېرل کېږي، چې په کې د بېلابېلو هېوادونو لوی درستیزان، لوړپوړي پوځي چارواکي او د معتبرو دفاعي شرکتونو استازي ګډون کوي.

خوارزمي ټینګار کړی، چې په دې نړیواله پېښه کې د افغانستان د وسله‌والو ځواکونو د لوړپوړي استازي ګډون؛ له هېوادونو او نړیوالو شرکتونو سره د پوځي او دفاعي اړیکو د پیاوړتیا لپاره یو ښه فرصت برابروي او افغانستان ته دا امکان ورکوي، چې د پوځي ټکنالوژۍ او وروستیو لاسته راوړنو په اړه له نږدې خبر شي.

د پېښو پر وړاندې د مبارزې د ملي چمتووالي ادارې مسوولانو خبر ورکړی، چې د هرات ولایت په انجیل ولسوالۍ کې د تېرو جګړو له مهاله پاتې یو ۵۰۰ کیلوګرامه بم بریالی شنډ شوی دی.

د یادې ادارې د څرګندونو له مخې؛ د خلکو له خبر ورکولو وروسته سیمه د تخنیکي دلې له لوري وپېژندل شوه او د هیلو ټرسټ نړیوالې مؤسسې عملیاتي ځواکونه د اړوند ادارو پر همغږۍ سیمې ته ولېږل شول. یادو کاري ډلو له اړینو څېړنو وروسته؛ بم د بشپړو امنیتي اصولو په پام کې له نیولو سره یوې نامېشتې سیمې ته ولېږداوه او بیا هلته خوندي له منځه یووړ شو.

دغه بم هغه مهال وموندل شو، چې د سیمې یو اوسېدونکی د کور جوړولو لپاره د ځمکې د کېندنې پر مهال ورسره مخ او د مسوولو ادارو پر هڅو شنډ شو او د یوې شونې انساني ناورین مخه ونیول شوه.