د امریکا بهرنیو چارو وزیر مارکو روبیو ویلي، چې لږ تر لږه پېنځه هېوادونو په قطر کې د مېشتو افغان پناه‌غوښتونکو د منلو لپاره لېوالتیا ښودلې ده.

روبیو د سې‌شنبې پر ورځ د قانون جوړوونکو په شتون کې ویلي، چې حکومت نه غواړي د دوحې په السیلیه کمپ کې مېشت افغانان بېرته افغانستان ته ستانه کړي او د هغوی د بیا مېشتېدا لپاره یې له څو هېوادونو سره خبرې کړې دي.

هغه وایي: « مونږ اوس د هغو لارښوونو له مخې عمل کوو، چې متحده ایالتونو ته د افغانانو ننوتل منع کوي.»

نوموړي زیاته کړې؛ چارواکي هره ورځ په درېیمو هېوادونو کې د دوی د بیا مېشتېدا د لارو چارو د موندلو لپاره هڅې کوي.

اوس‌مهال له ۱۱۰۰ څخه ډېر افغانان د دوحې په السیلیه کمپ کې ژوند کوي.

د امریکا د استازو جرګې غړې ګریس منګ په استماعیه غونډه کې د هغو راپورونو په اړه اندېښنه څرګنده کړې؛ ښايي یو شمېر افغانان هغو هېوادونو ته ولېږدول شي، چې له امنیتي یا بشري ستونزو سره مخ دي، لکه کانګو.

روبیو په ځواب کې وویل، چې د ده په اند له یادو هېوادونو هیڅ یو د جګړې سیمه نه‌ده؛ خو ټینګار یې وکړ، چې ښايي یو هېواد په یوازې ځان ټول افغانان ونه‌مني.

هغه ویلي: « فکر نه‌کوم یو هېواد به ټول زر کسان ومني.»

نوموړي زیاته کړې؛ امریکا د هغو هېوادونو لټه کوي، چې د مسوولیت په وېش کې ونډه واخلي او افغان پناه‌غوښتونکو ته د بیا مېشتېدو د منلو وړ لارې برابرې کړي.

د ایټالیا پولیسو ویلي، چې د دغه هېواد په سویل کې پر لوی لاس د یوه موټر د سوځولو له کبله د څلورو کرنیزو کارګرانو د مړینې په تړاو یې دوه کسان نیولي دي.

د ایټالیا دولتي ټلویزیون RAI راپور ورکړی، چې قربانیان یو پاکستانی او درې افغانان دي.

د راپور له مخې، نیول شوي دوه کسان هم د پاکستان وګړي دي.

دا پېښه د ایټالیا د سویلي کالابریا ولایت د آمنډولارا سیمې د تېلو په یوه پمپ کې رامنځته شوې ده.

د امنیتي کمرو هغه انځورونه، چې ایټالیايي رسنیو خپاره کړي ښيي، چې شکمنو کسانو د سوځېدو وړ مایع موټر ته اچولې او بیا یې اور وراچولی دی.

د راپور له مخې، یو شکمن هڅه کوله د موټر دروازې تړلې وساتي. په داسې حال کې، چې اور غړانده شوی و. د موټر یوه بله سپرلۍ، چې افغان و؛ پر تېښته بریالی شوی او د سوځېدو د ټپونو له کبله روغتون ته لېږدول شوی دی.

د کاستروویلیاري ښار څارنوال السانډرو ډالسیو تائید کړې، چې د څلورو کسانو جسدونه د دوشنبې پر ورځ د موټر دننه موندل شوي او د دې پېښې په تړاو دوه شکمن کسان نیول شوي دي.

د اقتصاد وزیر دین محمد حنیف د ناروې د کډوالو شورا له ملاتړي مشر او سرپرست رابرټ انزیکوا سره په کتنه کې د کورنیو بې‌ځایه شویو ستونزو ته د رسېدنې، د روانو پروګرامونو د وضعیت، اړمنو کسانو ته د بېړنیو او عاجلو مرستو او شته ننګونو او اړتیاوو په اړه خبرې وکړې.

د اقتصاد وزارت ویلي، په دې کتنه کې رابرټ انزیکوا ډاډ ورکړی، چې د ناروې د کډوالو شورا به خپلې بشري مرستې او ملاتړي پروګرامونه روان وساتي.

نوموړي زیاته کړې؛ دغه پروګرامونه حقوقي مرستې، ښوونه او روزنه، د ژوند د معیشت ملاتړ، د خوړو خوندیتوب، کورنیو بې‌ځایه شویو او راستنېدونکو ته د عاجلو او بېړنیو مرستو رسول، ځوانانو ته د کاري فرصتونو برابرول او راستنېدونکو ته د سرپناه چمتو کول رانغاړي.

هغه زیاته کړې، سره له دې، چې د روان کال بودجه کمه شوې؛ خو دغه بنسټ په بېلابېلو ولایتونو کې د راستنېدونکو ستونزو ته د رسېدنې او د عاجلو بشري مرستو د وړاندې کولو لپاره ګڼ پروګرامونه تر لاس لاندې لري او اوس هم د زیانمنو او اړمنو خلکو ملاتړ ته ژمن دی.

د نوموړي د څرګندونو له مخې، د افغانستان د خلکو اړتیاوو ته د مرستندویو بنسټونو او تمویلوونکو د زیاتې پاملرنې د جلبولو هڅې به روانې وي.

د اقتصاد وزیر هم د ناروې د کډوالو شورا د بشري مرستو د دوام له کبله مننه کړې او ټینګار کوي، چې نړیواله ټولنه او مرستندویه بنسټونه باید پراختیايي پروژو، د کاري فرصتونو رامنځته کولو، د بندیزونو لرې کولو او د افغانستان د بهرنیو اسعارو د زېرمو آزادولو ته نوره ډېره پاملرنه وکړي.

هغه زیاته کړې؛ د کاري فرصتونو له برابرېدو، مسلکي زده‌کړو، له زیانمنو قشرونو ملاتړ او د کورنیو د اقتصاد پیاوړتیا سره به د اقتصادي ځان‌بسیاینې زمینه برابره شي او د اړمنو خلکو پر بهرنیو مرستو تکیه به هم کمه شي.