افغانستان د سې‌شنبې پر ورځ په ابوظبۍ کې له بنګله‌دېش سره د یوې ټسټ لوبې په وروستۍ پاڼۍ کې زړهراکښونکی ټینګار نندارې ته وړاندې کړ او لوبه یې مساوي پای ته ورسوله.

افغان لوبډلې په پېنځه ورځنۍ لوبه کې د بنګله‌دېش د بریا مخه ونیوله او په دوه‌یمه پاڼۍ کې یې ۱۴۲ آورونه ولوبول.

صدیق‌الله اتل د افغانستان د دې ټینګار مخکښ و او په ۳۳۲ توپونو یې ۱۱۱ منډې وکړې.

د افغانستان لوبډلمشر رحمت شاه د لوبډلې هوډ او مبارزه وستایله او څرګندوي، چې دا سخته ترلاسه شوې پایله ورته بریا ته ورته ولوله رامنځته کوي.

افغانستان د ۴۷۹ منډو د هدف وڅاره او د دوه‌یمې پاڼۍ تر پایه یې اووه لوبغاړي له لاسه ورکړل؛ خو د توپ‌وهنې له زغم ډکې او منظمې لوبې یې د بنګله‌دېش توپ‌اچوونکو ته د بریا فرصت ورنه‌کړ.

اکرام علی‌خېل ۳۳ منډې وکړې او رحمت شاه په دوه‌یمه پاڼۍ کې ۵۱ منډې جوړې کړې.

رحمت شاه له دې مخکې په لومړۍ پاڼۍ کې سلیزه وهلې وه. د هغه ۱۰۵ منډې د افغانستان په دې تاریخي لوبه کې د لوبډلمشرۍ د لومړۍ ټسټ لوبې لومړۍ سلیزه وه.

بنګله‌دېش وروسته له هغې د بریا په درشل کې ښکارېده، چې خپله دوه‌یمه پاڼۍ یې د اووه لوبغاړو پر سوځېدو د ۳۷۲ منډو پر جوړولو اعلان کړه.

لیټن داس پر ۱۱۷ توپونو ۱۰۲ منډې، نجم‌الحسین شانټو ۸۲ او مشفق‌الرحیم ۸۱ منډې وکړې.

مهیدي حسن میراز په ۵۲ منډو ناسوځېدلی پاتې شو.

لیټن داس د لوبې د غوره لوبغاړي جایزه وګټله.

هغه په لومړۍ پاڼۍ کې ۵۳ منډې او په دوه‌یمه پاڼۍ کې سلیزه وهلې وه.

نوموړي نهه لوبغاړي هم وسوځول او لومړنی ویکټ هغه ساتونکی شو، چې په یوه ټسټ لوبه کې یې د نیمه‌سلیزې، سلیزې او نهو سوځونو ریکارډ جوړ کړ.

د بنګله‌دېش توپ‌اچوونکي حسن محمود هم تاریخي کارنامه ترسره کړه او د دغه هېواد لومړی توپ‌اچوونکی شو، چې په ټسټ کرکټ کې درې پرله‌پسې ویکټې اخلي.

هغه د افغانستان پر وړاندې د ۵۵ منډو په بدل کې پېنځه ویکټې واخیستې؛ ایباډوټ حسین هم د افغانستان په لومړۍ پاڼۍ کې څلور ویکټې واخیستې.

افغانستان له دې مخکې د بنګله‌دېش د ۳۴۶ منډو په ځواب کې د لومړۍ پاڼۍ له ۲۴۰ منډو جوړولو وروسته وسوځېد.

رحمت شاه او عبدالمالک، چې ۶۲ منډې یې کړې وې؛ د بنګله‌دېش د پیاوړې پیل شوې توپ‌وهنې وروسته د افغانستان پاڼۍ بېرته منظمه کړه.

د بنګله‌دېش لوبډلمشر شانټو د افغانستان لوبه وستایله او څرګندوي، لوبډله یې د بریا د نه ترلاسه کولو له کبله ناهیلې ده؛ خو له دې سیالۍ به ارزښتناک درسونه واخلي.

هغه د لیټن ډاس د بېرته ښه لوبېدا او د خپلې لوبډلې د چټکو توپ‌اچوونکو ونډه هم وستایله.

رحمت شاه بیا د لوبغاړو د هڅو ستاینه وکړه او څرګندوي؛ هغوی خپلې لوبې ته ژمن پاتې شول او پوهېدل، چې کله برید وکړي او کله دفاعي لوبه وکړي.

نوموړي د لوبې پر وروستۍ ورځ د صدیق‌الله اتل زغم او پوخوالی وستایه.

اوس د متحده عربي اماراتو د یو ورځنیو لوبو درې‌اړخیزې سیالۍ ته پام اوړي، چې افغانستان، بنګله‌دېش او زیمبابوې به په کې برخه واخلي.

ټاکل شوې، چې بنګله‌دېش د شنبې پر ورځ د تلې پر پېنځه‌ویشتمه / د اوکټوبر پر اووه‌لسمه د ابوظبۍ په شیخ زاید لوبغالي کې د دې سیالیو په لومړۍ لوبه کې له زیمبابوې سره مخ شي.

افغانستان د دوشنبې پر ورځ په ابوظبۍ کې د بنګله‌دېش پر وړاندې د یوازنۍ ټسټ لوبې د څلورمې ورځې په پای کې د ۴۷۹ منډو هدف ته د رسېدو لپاره ۳۴۷ نورو منډو ته اړتیا لرله او اووه لوبغاړي یې اوس هم په لوبه کې پاتې دي.

افغان لوبډلې د څلورمې ورځې لوبه د درې لوبغاړو پر سوځېدا د ۱۳۲ منډو پر لرلو پای ته ورسوله. صدیق‌الله اتل، چې ۱۲۶ توپونه یې لوبولي؛ پر ۳۵ او حشمت‌الله شهیدي پر ۱۹ منډو ناسوځېدلي پاتې شول.

د لوبډلمشر رحمت شاه د لوبې د ورځې له پای ته رسېدا لږ مخکې پر ۵۱ منډو وسوځېد او بنګله‌دېش ته یې د افغانستان د منډو د تعقیب پر مهال مهمه ویکټه پر لاس ورکړه.

رحمت شاه، چې په لومړۍ پاڼۍ کې یې سلیزه وهلې وه؛ د عبدالمالک او شاهدالله له ژر سوځېدا وروسته له صدیق‌الله اتل سره د افغانستان منډې باثباته کړې وې. دغو دواړو لوبغاړو د افغانستان منډې له ۱۰۰ واړولې؛ خو رحمت شاه د ایبادوت حسین د هغه توپ پر وړاندې، چې پر ځمکه له لګېدا وروسته یې لوری ل. بدل کړ؛ د توپ‌لرګي د بهرنۍ څنډې پر لګېدو وسوځېد.

له دې مخکې، بنګله‌دېش د غرمې له ډوډۍ لږ وروسته خپله دوه‌یمه پاڼۍ د اووه لوبغاړو پر سوځېدا د ۳۷۲ منډو پر لرلو اعلان کړه او افغانستان ته یې د ۴۷۹ منډو ستونزمن هدف وټاکه.

د بنګله‌دېش لوبډلې ویکټ‌ساتونکي توپ‌وهونکي لیټن داس سلیزه ووهله او مهدي حسن میراز پر ۵۱ منډو ناسوځېدلی پاتې شو. دغو دواړو د اوومې ویکټې لپاره ۱۴۹ منډې جوړې کړې او د بنګله‌دېش دریځ یې نور هم پیاوړی کړ؛ که څه هم افغانستان د دې ملګرتیا د ماتولو لپاره څو فرصتونه برابر کړي وه.

لیټن داس په دې لوبه کې د اته لوبغاړو په سوځولو کې هم ونډه لرله او په ټسټ لوبو کې یې د بنګله‌دېش د ویکټ‌ساتونکو له‌خوا د تر ټولو ډېرو لوبغاړو د سوځولو نوی ریکارډ جوړ کړ.

افغانستان اوس د لوبې د ژغورلو لپاره له ستونزمن حالت سره مخ دی؛ اووه ویکټې یې پاتې دي او د بریا لپاره ۳۴۷ نورو منډو ته اړتیا لري. بل لور ته، بنګله‌دېش د بریا د ترلاسه کولو لپاره د افغانستان د اووه نورو لوبغاړو سوځولو ته اړتیا لري.

د بنګله‌دېش کرکټ ملي لوبډلې د یکشنبې پر ورځ په ابوظبۍ کې د افغانستان پر وړاندې د ټسټ لوبې په درېیمه ورځ د مشفق‌الرحیم او نجم‌الحسین شانټو د غوره توپ‌وهنې پر مټ خپله مخکښي پیاوړی کړه او د ۳۲۹ منډو پر توپیر مخکې شو.

د بنګله‌دېش توپ‌اچوونکو حسن محمود او عبادت حسین د افغانستان د توپ‌وهنې په دوه‌یمه پاڼۍ کې له پیل مخکې د افغان توپ‌وهونکو لوبډله له ستونزو سره مخ کړه او په لومړۍ پاڼۍ کې یې د بنګله‌دېش لپاره د ۱۰۶ منډو مخکښي برابره کړه.

حسن محمود پېنځه او عبادت حسین څلور لوبغاړي وسوځول او افغانستان په لومړۍ پاڼۍ کې د ۲۴۰ منډو پر جوړولو وسوځېد. رحمت شاه، چې په خپله لومړۍ ټسټ لوبه کې یې د لوبډلمشر په توګه لوبه کوله؛ د ۱۰۵ منډو پر جوړولو د افغانستان غوره توپ‌وهونکی شو. عبدالمالک هم ۶۲ منډې جوړې کړې.

حسن محمود د درې پرلهپسې لوبغاړو پر سوځولو(هټ‌ټرېک) کولو د بنګله‌دېش لومړنی چټک توپ‌اچوونکی شو، چې په ټسټ لوبو کې دې لاسته‌راوړنې ته رسیږي. نوموړي په خپله اوولسمه ټسټ لوبه کې د ویکټو شمېر ۵۰ ته هم ورساوه.

بنګله‌دېش دوه‌یمه پاڼۍ په ښه پیل سره پیل کړه؛ خو د درې لوبغاړو تر ژر سوځېدا وروسته افغانستان  بېرته لوبې ته د راګرځېدا هیله پیدا کړه.

دغه راز مشفق‌الرحیم او نجم‌الحسین شانټو د څلورمې ویکټې لپاره د ۱۵۹ منډو ملګرتیا وکړه او د لوبې بهیر یې د بنګله‌دېش پر ګټه بدل کړ.

مشفق‌الرحیم په ۱۴۸ توپونو ۸۱ او شانټو په ۱۹۱ توپونو ۸۲ منډې جوړې کړې.

افغانستان د درېیمې ورځې په وروستیو کې یو ځل بیا د لوبې ډګر ته ور وګرځېد.

ضیاءالرحمن؛ مشفق‌الرحیم او حسن محمود وسوځول او قیس احمد هم د لوبې له پای ته رسېدو لږ مخکې شانټو له ډګره بهر کړ.

بنګله‌دېش به څلورمه ورځ د ۳۲۹ منډو پر مخکښۍ پیل کړي؛ خو افغانستان هڅه کوي، چې د منډو واټن راکم او لوبې ته بېرته راوګرځي.