د افغانستان چټک توپ‌اچوونکی فضل‌الحق فاروقي د ډي‌پي ورلډ نړیوال آی‌ال‌ټي‌۲۰ لیګ د پېنځم پړاو په داوطلبۍ(بولۍ ) کې د ۳۸۰ زره امریکايي ډالرو په بدل کې له ام‌آی اماراتو لوبډلې سره یوځای او د دغه لیګ په تاریخ کې یې د لوبغاړو د اخیستلو د بیې پخوانی ریکارډ مات کړ.

په دوبۍ کې د اوکټوبر میاشتې په داوطلبۍ کې څلورو لوبغاړو د تېر پړاو د ۲۶۰ زره ډالرو ریکارډ مات کړ. دغه ریکارډ د انډره فلیچر له‌خوا جوړ شوی و. د لیګ لوبډلو د راتلونکو سیالیو لپاره د خپلو لوبډلو د پیاوړتیا لپاره پر لوبغاړو ډېرې پیسې ولګولې.

د انګلستان هر اړخیز لوبغاړی لیم لیوینګسټون د ۳۵۰ زره ډالرو په بدل کې له ګلف جاینټس لوبډلې سره یوځای شو او د داوطلبۍ دوه‌یم تر ټولو ګران بیه لوبغاړی شو.

د افغانستان ویکټ ساتونکی او توپ‌وهونکی رحمان‌الله ګربز هم له همدې لوبډلې سره یوځای شو. ګلف جاینټس د خپل لومړیتوب حق په کارولو سره نوموړی د ۳۱۰ زره ډالرو په بدل کې خپل کړ.

د سویلي افریقا پخواني لوبډلمشر فاف ډوپلیسي د ۳۰۰ زره ډالرو په بدل کې له دوبۍ کپیټلز لوبډلې سره تړون وکړ.

د پېنځم پړاو سیالیو په درشل کې د فاروقي پر ریکارډي بیه اخیستل د افغانستان کرکټ د نړیوالو لوبغاړو پر وړتیا د لوبډلو لوړه لېوالتیا ښيي. ټاکل شوې، چې د دغه لیګ سیالۍ د ۲۰۲۶ز.کال د نومبر له یوویشتمې د ډسمبر تر شلمې ترسره شي.

د پاکستان نومیالي لوبغاړي له دفاعي اتلانو سره یوځای شول

ډیزرټ وایپرز لوبډلې د پاکستان څلور نړیوال لوبغاړي؛ بابر اعظم، نسیم شاه، فخر زمان او شاداب خان، هر یو د ۸۰ زره ډالرو پر لومړنۍ بیه واخیستل.

ټاکل شوې، چې بابر اعظم د آی‌ال‌ټي‌۲۰ لیګ په پېنځم پړاو کې د لومړي ځل لپاره ولوبېږي؛ خو نسیم شاه او فخر زمان بېرته له دفاعي اتلې لوبډلې سره یوځای شوي دي.

په دې داوطلبۍ کې د متحده عربي اماراتو لوبغاړی محمد وسیم هم د دغه لیګ په تاریخ کې د خپل هېواد تر ټولو ګران بیه لوبغاړی شو. ام‌آی اماراتو د خپل لومړیتوب حق په کارولو سره نوموړی د ۲۱۰ زره ډالرو په بدل کې واخیست.

د متحده عربي اماراتو بل لوبغاړی الیشان شرفو د ۱۱۰ زره ډالرو په بدل کې له ابوظبۍ نایټ رایډرز سره یوځای شو؛ محمد روهید او ایان خان بیا هر یو د ۹۵ زره ډالرو په بدل کې واخیستل شول.

لوبډلو پر نړیوالو لوبغاړو پانګونه وکړه

د لیګ شپږ لوبډلو د هغو هېوادونو پر لوبغاړو هم پانګونه وکړه، چې د کرکټ د نړیوالې شورا د ملګرو غړیو په ډله کې دي. دا چاره د دغه لیګ نړیوال پراخوالی ښيي.

د امریکا لوبغاړو امشي ډي سلوا او حسن خان پر ترتیب له ابوظبۍ نایټ رایډرز او دوبۍ کپیټلز سره د ۱۰۰ زره او ۹۰ زره ډالرو په بدل کې تړونونه وکړل.

د سکاټلینډ لوبغاړی برینډن مک‌مولن د ۸۰ زره ډالرو په بدل کې له شارجې واریئرز سره یوځای شو؛ د نامیبیا ډیویډ وایس بیا د ۷۰ زره ډالرو په بدل کې له ګلف جاینټس سره تړون وکړ.

د نورو مهمو قراردادونو له ډلې؛ د ویسټ انډیز چټک توپ‌اچوونکی الزاري جوزف د ۲۳۰ زره ډالرو په بدل کې له ګلف جاینټس سره یوځای شو.

د انګلستان چټک توپ‌اچوونکی ریچارډ ګلیسن د ۱۸۰ زره ډالرو په بدل کې له شارجې واریئرز سره تړون وکړ؛ کریس جورډن بیا د ۱۷۰ زره ډالرو په بدل کې له ام‌آی اماراتو سره یوځای شو.

ډیزرټ وایپرز هم د خپل لومړیتوب حق پر کارولو د انګلستان چټک توپ‌اچوونکی ډیویډ پین د ۱۵۰ زره ډالرو په بدل کې له ځان سره وساته.

افغان لوبغاړي د لیګ په بېلابېلو لوبډلو کې

د افغانستان نړیوالو لوبغاړو په دې داوطلبۍ کې د پام وړ ونډه لرله او څو لوبغاړي یې له بېلابېلو لوبډلو سره تړونونه وکړل.

له فاروقي او ګربز پرته محمد نبي د ۱۴۰ زره ډالرو په بدل کې له شارجې واریئرز سره یوځای شو؛ ګلبدین نایب بیا د ۷۵ زره ډالرو په بدل کې له ابوظبۍ نایټ رایډرز سره تړون وکړ.

دوبۍ کپیټلز صدیق‌الله اتل د ۷۰ زره ډالرو او کریم جنت د ۴۰ زره ډالرو په بدل کې واخیستل.

ګلف جاینټس پیلیز توپ‌وهونکی ابراهیم ځدراڼ د ۶۵ زره ډالرو په بدل کې واخیست؛ ام‌آی اماراتو بیا د خپل لومړیتوب حق په کارولو سره الله‌غضنفر د ۱۵۰ زره ډالرو په بدل کې له ځان سره وساته.

عرب ګل هم د ۸۰ زره ډالرو په بدل کې له ابوظبۍ نایټ رایډرز سره یوځای شو او په دې توګه په سیالیو کې د افغان لوبغاړو شمېر زیات شو.

ام‌آی اماراتو پر لوبغاړو تر ټولو ډېرې پیسې ولګولې

ام‌آی اماراتو په داوطلبۍ کې ټولټال دوه میلیون ډالر ولګول او د لګښت له پلوه د لیګ په لوبډلو کې یې لومړی ځای خپل کړ. ګلف جاینټس بیا د ۱.۹۷۲ میلیون ډالرو پر لګښت ورپسې شو.

دوبۍ کپیټلز ۱.۸۳۴ میلیون ډالر او شارجې واریئرز ۱.۷۲ میلیونه ډالر ولګول.

ابوظبۍ نایټ رایډرز ۱.۵۴۹ میلیون ډالر او ډیزرټ وایپرز ۱.۵۴۴ میلیون ډالر ولګول.

په دې داوطلبۍ کې د کرکټ نړۍ ګڼو مشهورو څېرو هم ګډون کړی و، چې په کې د پېنځم پړاو سفیر بریټ لي، د سویلي افریقا پخوانی لوبغاړی اې‌بي ډیویلیرز، الان ډونالډ، شعیب ملک او عثمان خواجه شامل ول.

ټاکل شوې، چې د ډي‌پي ورلډ آی‌ال‌ټي‌۲۰ لیګ پېنځم پړاو د نومبر له یوویشتمې د ډسمبر تر شلمې ترسره شي او شپږ لوبډلې به د اتلولۍ لپاره سیالي وکړي.

د افغانستان کرکټ مینه‌والو لپاره په دې سیالیو کې د فاروقي، ګربز، نبي او نورو ملي لوبغاړو ګډون د ډېرې لېوالتیا لامل دی. دغه لیګ اوس هم د نړۍ د بېلابېلو هېوادونو لوبغاړي جذبوي او لوبډلې پرې د پام وړ پانګونه کوي.

مینه‌وال به د دغو سیالیو ټولې لوبې پر ځانګړې بڼه د آریانا ټلویزیون او ډیجیټلي خپرنیزو پاڼو له لارې کتلی شي.

تیم عینو مینه روز یکشنبه در دیدار پنجاه‌وهفتم فصل ششم لیگ قهرمانان افغانستان روشن، در کابل با نتیجه ۵ بر ۴ عمر ځواک را شکست داد.

عینو مینه که پیش از این دیدار در جایگاه هفتم جدول امتیازات قرار داشت، پنج گول خود را توسط نبی مقدس و هدایت‌الله، هر کدام با دو گول، و امید ساحل به ثمر رساند. 

در سوی دیگر، حاتم شیردل، شاداب ملک‌زاده، بلال احمد و اعظم‌الدین حاجی‌زاده هر کدام یک گول برای عمر ځواک به ثمر رساندند؛ اما نتوانستند مانع شکست تیم‌شان شوند. تیم عمر ځواک در جایگاه سوم جدول قرار دارد.

در این دیدار، بازیکنان عینو مینه یک کارت زرد و یک کارت سرخ دریافت کردند، در حالی که داور دو کارت زرد به بازیکنان عمر ځواک نشان داد. عینو مینه هشت خطا، دو آفساید و چهار ضربه کرنر ثبت کرد؛ در مقابل، عمر ځواک ۱۰ خطا، ۹ آفساید و سه کرنر داشت.

با این پیروزی، عینو مینه سه امتیاز ارزشمند به دست آورد.

فصل ششم لیگ قهرمانان افغانستان روشن به‌گونه مستقیم از تلویزیون آریانا پخش می‌شود و علاقه‌مندان فوتبال در سراسر کشور می‌توانند این رقابت‌ها را دنبال کنند.

د افغانستان کرکټ ملي لوبډلې د کرکټ نړیوالې شورا (آی‌سي‌سي) د یوورځنیو سیالیو په تازه لړلیک کې له انګلستان څخه مخکې او د نړۍ اووم مقام ته پورته شوې ده. افغانستان له دې سره د خپلې لوبډلې د تاریخ تر ټولو غوره مقام له خپل پخواني ریکارډ سره برابر کړی دی.

د شنبې پر ورځ( د اوکټوبر پر څلیریشتمه ) د خپور شوي لړلیک له مخې؛ افغانستان د ۹۴ امتیازونو پر ترلاسه کولو اووم مقام خپل کړی؛ انګلستان د ۹۳ امتیازونو پر لرلو اتم مقام ته لوېدلی او سریلانکا د ۹۵ امتیازونو پر لرلو شپږم مقام لري.

افغانستان لومړی ځل د ۲۰۲۵ز.کال په می میاشت کې د نړۍ د یوورځنیو سیالیو په لړلیک کې اووم مقام ته رسېدلی و او اوس یې یو ځل بیا دا تاریخي لاسته‌راوړنه تکرار کړې ده.

په درې‌اړخیزو سیالیو کې اتلولي؛ د افغانستان د پرمختګ لامل

له زیمبابوی او بنګله‌دېش سره په درې‌اړخیزو سیالیو کې د افغانستان لوبډله وځلېده. افغانستان د اوکټوبر پر درویشتمه( د جمعې پر ورځ ) د دغو سیالیو په پایلوبه کې زیمبابوی ته د اووه ویکټو پر توپیر ماتې ورکړه او اتلولي یې وګټله.

په دې لوبه کې افغان توپ‌اچوونکو د زیمبابوی لوبډله د ۱۶۹ منډو له جوړولو وروسته ټوله وسوځوله. راشد خان د درې لوبغاړو پر سوځولو د افغانستان پر ګټه غوره توپ‌اچونه وکړه.

د افغانستان په توپ‌وهنه کې ابراهیم ځدراڼ د ۷۰ ناسوځېدلو منډو پر جوړولو د لوبډلې په بریا کې مهم رول ولوباوه. رحمت شاه هم ۴۳ منډې جوړې کړې او افغانستان په ۳۴.۳ آورونو کې ټاکل شوی هدف پوره کړ.

په نړیوال لړلیک کې د انګلستان شاتګ

انګلستان له سریلانکا څخه له وروستۍ ماتې وروسته په نړیوال لړلیک کې یو مقام له لاسه ورکړی دی. دې لوبډلې د ۴۳۰ منډو لوړ هدف وټاکه؛ خو د دفاع په برخه کې یې بریا ترلاسه نه‌کړه او سریلانکا د یوورځنیو سیالیو په تاریخ کې د هدف د پوره کولو له سترو بریالیو هڅو څخه یوه ترسره کړه.

د افغانستان کرکټ ملي لوبډلې د نړۍ په لړلیک کې اووم مقام ته پرمختګ؛ په نړیوالو سیالیو کې د دې لوبډلې د پرمختګ او د نړۍ له نومیالیو لوبډلو سره د سیالۍ د وړتیا د زیاتېدا ښکارندوی دی.