د اقتصادي کمیسیون په اوونیزه غونډه کې، چې مشري یې د ریاست‌الوزرا اقتصادي مرستیال ملا عبدالغني برادر کوله؛ د کرنې او مالدارۍ سکټور د پراختیا ملي پالیسي تائید شوه.

د ریاست‌الوزرا د خبرپاڼې له مخې؛ د کرنې او مالدارۍ سکټور میکانیزه کول، د کرنې د څېړنیزو او ترویجي سیسټمونو پراختیا، د کرنې، اوبولګولو او مالدارۍ وده، د اوبولګولو د سیسټمونو مدیریت، په یادو برخو کې د پانګونې ملاتړ او خلکو ته د باکیفیته کرنیزو او حیواني محصولاتو د لاسرسي برابرول د دې پالیسۍ بنسټیزې موخې دي.

په دې غونډه کې د کب‌روزنې د سکټور د پراختیا طرحه هم تائید شوه.

د دغې طرحې له مخې؛ د خصوصي سکټور د پانګونې له لارې به د هېواد په بېلابېلو سیمو کې پر ۶۵۰۰ هکټاره ځمکه د کب‌روزنې ۷۷۰۰ واړه، منځني او لوی فارمونه جوړ شي.

ویل کیږي، چې د دې طرحې له پلي کېدا سره به په مستقیم ډول ۵۰ زره کسانو او په غیرمستقیم ډول ۲۵۰ زره نورو ته د کار زمینه برابره شي.

په کابل کې د ملګرو ملتونو د مرستندویه ماموریت په کوربه‌توب د دوحې پروسې د خصوصي سکټور د کاري ډلې درېیمه غونډه په حضوري او انلاین بڼه ترسره شوې.

په دې غونډه کې د افغانستان اسلامي امارت استازو د بهرنیو چارو، مالیې، صنایعو او سوداګرۍ، اقتصاد، کار او ټولنیزو چارو وزارتونو او همدارنګه د افغانستان بانک استازو ګډون درلود.

پر دې سربېره د یوناما، ملګرو ملتونو، نړیوالو او سیمه‌ییزو بنسټونو، سفیرانو، ډیپلوماټانو او د خصوصي سکټور کارپوهانو هم ګډون کړی و.

غونډه په دوه برخو کې ترسره شوه؛ لومړۍ برخه پر ودې او ګډون راوڅرخېده او په دوه‌یمه برخه کې پر همغږۍ او رڼښت خبرې وشوې.

د افغانستان اسلامي امارت استازو د امارت له واکمنېدا وروسته لاسته راوړنې او پرمختګونه وړاندې کړل او ګډونوالو د اړوند هڅو د ستاینې تر څنګ د خصوصي سکټور د ملاتړ او همکاریو د پیاوړتیا پر اړتیا ټینګار وکړ.

په روسیه کې د افغانستان سفارت ویلي، چې په دې هېواد کې افغان سفیر ګل حسن حسن د دوشنبې پر ورځ( د سلواغې شلمه ) په مسکو کې د افغانستان اسلامي امارت سفیر او ځانګړي استازي ګل حسن حسن له روسیې میشتو افغان سوداګرو سره د سوداګریزو اړیکو پر پیاوړتیا خبرې کړې دي.

د یاد سفارت په خپره شوې خبرپاڼه کې راغلي: په دې کتنه کې، چې د سفارت یو شمېر ډیپلوماټانو هم  ګډون درلود؛ د متقابل تفاهم، همغږۍ او اقتصادي اړیکو پر پیاوړتیا سربېره د افغانستان او روسیې د اړوند سوداګریزو ستونزو په اړه هم خبرې شوې دي.

ګل حسن حسن افغان سوداګر په هېواد کې پانګونې ته وهڅول او دا یې د هغوی ملي دنده وبلله.

نوموړي افغان سوداګرو ته ډاډ څرګند کړ، چې سفارت د سوداګریزو چارو په برخه بشپړه همکاري کوي.

ویل کیږي، چې روسیې میشتو افغان سوداګرو هم په بېلابېلو برخو کې خپلې ستونزې، اندېښنې او وړاندیزونه وړاندې کړل او د اسلامي امارت له اړوند ادارو یې د اغېزمن ملاتړ، همکارۍ او پاملرنې غوښتنه وکړه.