د اسرائیلو پوځ نن (یکشنبه د غبرګولي پېنخه‌ویشتمه) یوه خبرتیا خپره کړه او له ایرانیانو یې وغوښتل، چې اوسمهال د پوځي وسلو کارخونو او حکومتي ادارو ته له نږدې سیمو څخه ووځي.

دا خبرداری، چې د ټولنیزو رسنیو او نړیوالو رسنیو له لارې خپور شو؛ ټینګار کوي، چې په دې سیمو کې پاتې کېدل د خلکو ژوند له خطر سره مخ کوي.

د رویټرز د څرګندونو له مخې؛ دا خبرداری د ایران د پوځي او اټومي تاسیساتو په ګډون پر پارچین او نطنز اډو د اسرائیلو د بریدونو له زیاتوالي وروسته خپور شو.

دا خبرتیا د ایران لخوا پر اسرائیلو د لویو توغندیزو او هوایي بریدونو وروسته خپره شوه، چې ۱۴ کسان یې ووژل او له ۲۰۰ څخه ډېر یې ټپیان کړل.

د اسرائیلو پوځ اعلان کړی، چې د ایران پر پوځي بنسټونو راتلونکي بریدونه به ډېر سخت وي.

سي‌ان‌ان د اسرائیلي چارواکو د څرګندونو له مخې ویلي، چې دا خبرداری د ملکي تلفاتو د کمولو لپاره ورکړ شوی؛ خو ځینې شنونکي دا د تل ابیب د رواني جګړې یوه برخه ګڼي.

ایراني چارواکو دا خبرداری “رواني ترهګري” بللې او له خلکو یې غوښتي، چې ارام پاتې شي.

ملګرو ملتونو له دواړو خواوو څخه د شخړې د زیاتېدو د مخنیوي لپاره د زغم غوښتنه کړې ده.

اکسیوس اوبپاڼې د یکشنبې پر ورځ( د غبرګولي پېنځه‌ویشتمه) د دوه اسرائیلي چارواکو د څرګندونو له مخې راپور ورکړی؛ دې هېواد په تېرو ۴۸ ساعتونو کې له امریکا غوښتنه کړې، چې د ایران پر وړاندې په جګړه کې برخه واخلي.

د راپور له مخې؛ اسرائیل له واشنګټن څخه غوښتي، چې د ایران د اټومي پروګرام د بشپړ ویجاړولو لپاره دې په روانه جګړه کې ګډون وکړي.

په راپور کې راغلي؛ اسرائیل درانه بمبارډ کوونکې الوتکې نلري او نشي کولی د ایران د یورانیمو د غني کولو فردو نومی ځای ویجاړ کړي.

د راپور له مخې، امریکا دا ډول وسلې لري او ایران به ورته نږدې ځای پر ځای شي.

د اکسیوس د څرګندونو له مخې؛ که امریکا ان د ایران یو محدود سایټ هم بمبارډ کړي؛ نو دا به له ایران سره مستقیمه جګړه وي.

دغه راز زیاته شوې: ” که له عملیاتو له پای ته رسېدو وروسته د فردو سایټ فعال پاتې شي؛ اسرائیل به د خپل اصلي هدف په ترلاسه کولو کې پاتې راشي، چې د ایران د اټومي پروګرام ویجاړول دي.”

یوه اسرائیلي چارواکي اکسیوس ته ویلي؛ شونې ده، چې امریکا د اسرائیل او ایران ترمنځ په جګړه کې ښکېله شي.

راپور زیاته کړې، چې د امریکا ولسمشر ډونالډ ټرمپ د اسرائیلو له لومړي وزیر بنیامین نتنیاهو سره په دې وروستیو کې د خبرو پرمهال د اړتیا له مخې دا ژمنه کړې ده.

د یادونې ده، چې د اسرائیلو او ایران ترمنځ جګړه درېیمې ورځې ته وردننه شوې، چې دواړه خواوې پر یو بل توغندیز بریدونه کوي.

ملګري ملتونه وايي، چې د افغانستان نږدې یو پر درېیمه برخه وګړي د څښاک پاکو اوبو ته لاسرسی نلري.

دغه راز دې ټولنې ویلي، چې له ۱۰ میلیون ډېر خلک له غیر صحي او ناامنه سرچینو څخه کار اخلي.

ملګرو ملتونو زیاته کړې، چې له یو څه بدلون سره – سره، دا ناورین پر کلیوالي خلکو په ځانګړي توګه ښځو او ماشومانو پراخ فشار راوړي.

ملګرو ملتونو ویلي، چې دوی ژمن دي، چې د لاندې ستونزو په اړه مبارزه وکړي:

✔ د جګړې او وچکالۍ له کبله د اوبو ویجاړو شويو بنسټونو د خوندي کولو او بیا رغولو لپاره مبارزه وکړي.

✔ تر ۲۰۲۶ کال پورې له ۵ میلیون څخه زیاتو افغانانو ته د روغتیا او حفظ الصحې د خدماتو ښه کول او پراخول.

✔ د اوبو سرچینو د دوامداره مدیریت لپاره د لرې پرتو سیمې د خلکو د ظرفیت لوړول.