د تخار په خواجه بهاالدین کې ۲۱ پاڅونوالو ته مرګ و ژوبله اوښتې

 د تخار په خواجه بهاالدین کې د ملک تاتار د پاڅونوالو پر قرارګاه د وسلوالو طالبانو په برید کې ۱۷ پاڅونوال وژل شوي او څلور نور ټپيان دي.

د تخار والي ویاند محمد جواد هجري ویلي؛ وسلوالو طالبانو د یکشنبې پر شپه د خواجه بهاالدین ولسوالۍ د لاله ګذر د سیمي د کوکچې سیند پرغاړه ولسوالیو د پاڅونوالو د مشر ملک تاتار د افرادو پر قرارګاه برید کړی، چې له کبله یې ۱۷ پاڅونوال وژل شوي او څلور نور ټپیان دي.

د تخارامنیه قومندانۍ ویاند خلیل اسیر وايي، د کوکچې سیند پرغاړه په پرتو ولسوالیو کې د وسلوالو طالبانو د ګواښونو د له منځه وړلو پر موخه د یکشنبې پر سهار ګډ عملیات تر سره شوي دي.

د تخار ولایتي شورا غړي محمد اعظم افضلي ویلي؛ د وسلوالو طالبانو د فعالیتونو د ډېروالي لامل د سیمه ییزو چارواکو کمزوري ګڼي او له حکومت غواړي، چې دې ستونزې ته پاملرنه وکړي.

په تخار کې مدني مخکښانوهم د دې ولایت پر اوسني امنیتي وضعیت اندېښنه ښکاره کړې ده.

د تخار ولایت مدني مخکښ اسد الله زمري ویلي؛ حکومت مخابراتي شبکو ته په شپه کې د فعالیت زمینه برابره نکړه، چې له کبله یې طالبانو د شپې بریدونه هم ډېر کړي دي.

دا په داسې حال کې ده، چې په وروستیو لس ورځو کې د تخار د اشکمش ولسوالۍ او څو نورو سیمو پر امنیتي پوستو وسلوالو بریدونه کړي دي.

د تخار اوسیدونکي وايي ترهغې، چې حکومت نیول شوې سیمې ونه ساتي؛ عملیات پایله نلري.