د طالب او امریکایي پلاوو د مشرانو تر منځ د سولې هوکړه لیک له اتلس میاشتو پېچلو او سختو خبرو وروسته نن شنبه د کب ۱۰ / د فبروري ۲۹  د قطر په دوحه کې لاسلیک شو.

د امریکا د بهرنیو چارو وزیر مایک پمپیو وایي، د جګړې ټولو لوریو ته په کار ده، چې تلپاتې سولې ته د رسیدو لار ولټوي؛ ځکه، چې د امریکا او طالبانو هوکړه دې کار ته ځانګړې زمینه برابروي.

 مایک پمپیو زیاته کړې، د سولې هوکړه لیک لاسلیک طالبانو ته یوه آزموینه ده او مونږ خپل راتلوونکي ګامونه د دوی کړنو ته په کتو پورته کوو.

د مایک پمپیو وایي: پخپلو ژمنو ودریږئ، له القاعده سره اړیکې پرې کړئ او له داعش سره جګړه وکړئ. د تاوتریخوالي کمي اوونۍ د سولې شرایط برابروي او د جګړې پراختیا به دا هوکړه له منځه یوسي. له افغان دولت سره کینئ، له مدني فعالانو سره کینئ؛ صبر ولرئ، ستونزې به وي، خو د ټول ګډون حکومت لپاره کار وکړئ.  که په خپلو ژمنو ودریږئ، مونږ به له تاسو سره اړیکې وساتو. مونږ ته به بری هغه مهال ممکن وي، چې افغانستان بیا مونږ او زمونږ متحدینو ته خطر نشي.

په قطر کې د طالبانو د سیاسي دفتر مشر ملاعبدالنغي برادر وایي؛ مونږ یوې داسې پایلې ته رسیږو،  چې د افغانستان په ګټه ده، اسلامي امارت له امریکا سره کړې ژمنې ته ژمن دی. مونږ غواړو، چې د یوه سیاسي ځواک په توګه څرګند شو.

په قطر کې د طالبانو د سیاسي پلاوي غړي مولوي عبدالسلام حنفي د آریانا نیوز خبریال ته ویلي، چې د بهرنیو ځواکونو لومړۍ جوپه به لس ورځې وروسته د بګرام له پوځي ادې ووځي او د وتلو ټول بهیر به په ۱۴ میاشتو کې بشپړ شي.

په دوحه کې د طالب استازیو او امریکایانو د سولې هوکړه لیک د شاوخوا دېرش هېوادونو د استازیو په حضور کې لاسلیک شو.

دا په داسې حال کې ده، چې له امریکا سره د طالبانو د سولې دغه هوکړه له اووه ورځني اورکمه وروسته، چې پرون یې وروستۍ ورځ وه؛ لاسلیک شوه.