تازه خبرونه
د افغانستان د خبریالانو خوندیتوب کمیتې پر بي بي سي نیوکه کړې
د افغانستان د خبریالانو د خوندیتوب کمیتې د بي بي سي پر یوه رپوت نیوکه وکړه، چې ګواکي په کابل او نورو ولایتونو کې یې ځينې سیمې په قومي او مذهبي نسبت یادې کړې دي.
د افغانستان د خبریالانو د خوندیتوب کمیتې رییس نجیب شریفی وایي، لومړی دا، چې په کابل کې د شعیه میشتو او سني میشتو پر نومونو د سیمو وېش نشته او نشو کولی تر منځ یې کرښه راکاږو، چې دا د سعیه ګانو او دا د سنیانو سیمې دي. زه فکر کوم، چې دا فکر سم نه دی او له بې بې سي په پرېکنده توګه غواړم، چې په دې اړه حساس وي.
نوموړی د بې بي سي دغه ډول چلند د خبریالۍ له اصولو سره په ټکر کې ګڼي.
دغه راز ښاغلی نجیب شریفي د بې بې سي پر هغه ګزارش هم بې بنسټه وباله، چې ګواکې د وسلوالو طالبانو د رهبر ملا هبت الله زوي په هلمند کې ځانمرګی برید کړی دی.
د نوموړي په وینا؛ کله، چې د طالبانو ویاند ادعا کوي، چې په هلمند کې د ملا هبت الله زوی ځانمرګی برید کړی؛ مونږ نشو کول پر دې ادعا بسنه وکړو، ځکه یاد برید یو ترورستي کار دی او دا به دې ډلې ته تبلیغات هم وي.
په کابل کې د بي بي سي دفتر مسوولینو د خبریالانو د خوندیتوب د کمیتې د دغو څرګندونو په اړه له څه ویلو ډډه کړې ده.