Connect with us

تازه خبرونه

د مسکو ناسته د لیدلوریو د ټکر له کبله ځنډیدلې- بهرنیو چارو وزارت

Published

 on

(Last Updated On: وږی ۶, ۱۳۹۷)

د بهرنیو چارو وزارت وایي، د مسکو ناسته د افغان حکومت د سولې له لیدلوري سره د ټکر له کبله ځنډیدلې ده.

روسیې د امریکا، افغانستان، پاکستان او د مرکزي آسیا د هېوادونو په ګډون له دولس هېوادونو او طالبانو غوښتي وه، چې دې ناستې ته ورشي.

طالبانو ویلي وه، چې په دې ناسته کې ګډون کوي؛ خو کابل او واشنګټن په ډاګه کړې وه، چې د ناستې په اړه له افغان حکومت سره همغږي نده شوې، نو ګډون په کې نه کوي.

تېره ورځ(د وږي ۵) د روسیې د بهرنیو چارو وزیر سرګي لاوروف د افغانستان له ولسمشر اشرف غني سره په تیلیفوني اړیکه کې د مسکو ناسته، چې ټاکل شوې وه د سپتمبر پر ۴ چې د وږي له ۱۳ سره برابره ده جوړه شي؛ وځنډول شوه.

دا، چې کابل او مسکو به کله د ناستې پر نېټه او محتوا هوکړې ته رسیږي؛ معلومه نه ده.

د بهرنیو چارو وزارت اداري معین نصیر احمد اندیشه وایي، چې له دغې ناستې سره د ټکر یوه مساله د طالبانو د استازیو ور بلل دي.

د نوموړي د څرګندونو له مخې؛ دې غونډې ته د طالبانو بلل له رامنځته شوې سیمه ییزې او نړیوالې اجماع سره په ټکر کې دي او مونږ باید د اړوند اجماع له مخې خبرې وکړو.

د پوهنتون استاد نصرالله ستانکزی وایي؛ کوم څه، چې ډېر له خطره ډک ښکاري، هغه په سیمه کې د سترو ځواکونو د ګټو لټون دی.

د نوموړي په خبره: روس او امریکا، چې په سیمه کې د افغانستان د قضیې په اړه کوم تضاد لري؛ روس یې د مسکو او امریکا یې د قطر او نورو سیمو په ناستو کې څاري.  

پخواني طالب چارواکي وایي؛ د ناستې ځنډيدل به د دې سبب شي، چې طالبان د مسکو په ناسته کې ګډون ونکړي.

د طالبانو پخوانی غړی نظر محمد مطمئین وایي، چې د مسکو ناستې ځنډول د امریکا د سولې هڅې له شک سره مخ کوي. ښه به دا وه، چې د افغانستان حکومت او امریکا په دې ناسته کې ګډون کړی وای. اوس، چې وځنډیده؛ فکر کیږي، چې د افغانستان حکومت په بهرني سیاست کې د امریکا تګلاره څاري.

دا په داسې حال کې ده، چې د ازبکستان د بهرنیو چارو وزیر له افغان حکومتي مشرانو سره په خبرو کې د افغانانو په مالکیت د سولې له بهیره د خپل هېواد د ملاتړ ډاډ څرګند کړی دی.

تازه خبرونه

په ایران کې یوه افغان لس کسان پر چړې وژلي

Published

on

(Last Updated On: زمری ۱۸, ۱۴۰۱)

د ایران دولتي خبري آژانس ایرنا د کرمان ښار د چارسمبالي والي حسین رضايي د څرګندونو له مخې په ډاګه کړې؛ یوه افغان د یکشنبې پر ورځ د ایران په جنوبي ښار کرمان ولایت کې د شخصي دښمنۍ له کبله لس کسان پر چړې وژلي دي.

رضايي زياته کړې، شکمن د پوليسو لخوا هغه وخت ونيول شو، چې غوښتل يې ماښام  مهال له دې ولايته ووځي.

نوموړي د دغه افغان د ورور د څرګندونو له مخې ویلي؛ تورن ذهني بې ثباتي لرله او پر مخدره توکو روږدی و.

د رسنیو د راپور له مخې؛ په دې برید کې شپږ افغانان او څلور ایرانیان وژل شوي دي.

د دې سيمې چارواکي وايي، چې په دې پېښه کې يو بل تن ټپي شوى او تر درملنې لاندې دى.

Continue Reading

تازه خبرونه

په افغانستان کې مذهبي ډلې د خپلو مراسمو د ترسره کولو پوره آزادي لري

Published

on

(Last Updated On: زمری ۱۷, ۱۴۰۱)

د بهرنیو چارو وزارت سیاسي مرستیال نن په کابل کې د عاشورا نمانځغونډې ته وویل، د نامسلمانو په ګډون ټولې مذهبي ډلې کولی شي خپل مراسم په آزاده توګه ترسره کړي.

د اسلامي امارت د بهرنیو چارو وزارت سیاسي مرستیال شېر محمد عباس ستانکزی وايي؛ د افغانستان ټول مذهبونه او حتا غیر مسلم اقلیتونه د خپلو مذهبي مراسمو په ترسره کولو کې آزاد دي او په دې برخه کې کومه ستونزه نشته.

شېرمحمد عباس ستانکزي، چې د محرم پر لسمه يې په کابل کې خبرې کولې له خلکو وغوښتل، چې د اوسني نظام ملاتړ وکړي

نوموړي همداراز ټینګار کړی، چې ځینې هېوادونه د افغانستان د وضعیت په ګډوډولو کې خپلې ګټې ویني؛ خو مونږ په هېواد کې د ستونزو او جګړو د پای ته رسولو لپاره اړتیا لرو او خلک باید د دغو دسیسو پر وړاندې د اوسني نظام ملاتړ وکړي.

د بهرنيو چارو وزارت سياسي مرستيال په هېواد کې تېرو کورنيو جګړو ته په نغږته کې وايي، چې د پخواني شوروي اتحاد پر وړاندې د جهاد له بريا وروسته ډېرو کسانو د واک او شخصي انګېزو له کبله هېواد بې ثباته کړ.

شېر محمد عباس ستانکزي د خپلو خبرو په بهیر کې د داخلي مخالفتونو پر ختمېدو هم ټینګار څرګند کړ.

که څه هم د عاشورا د ماتم کوونکیو پر وړاندې د امنیتي ګواښونو په اړه اندېښنې موجودې وې؛ خو د عاشورا مراسم په بشپړ خوندي چاپېریال کې ترسره شول.

د یادونې ده، چې د محرم لسمه ورځ د امام حسین (ع) د شهادت د ویر او د هغه د غوښتنو او پوښتنو یادولو ته ځانګړې شوې ده.

Continue Reading

تازه خبرونه

په کابل کې د امریکا لخوا د القاعده د مشر وژل کېدل یوه ادعا ده – حکمتیار

Published

on

(Last Updated On: زمری ۱۷, ۱۴۰۱)

د حزب اسلامي مشر ګلبدین حکمتیار ويلي، د امریکا له لوري د القاعده د مشر ایمن الظواهري وژل یوازې یو تور دی او د دغه هېواد له لوري هیڅ ثبوت وړاندې شوی ندی.

حکمتیار د جمعې پر ورځ د خپلو خبرو په یوه برخه کې دغه عمل یو تروریستي عمل نومولی او وایي، چې امریکا د افغانستان له فضايي حریم او ملي حاکمیت څخه پوره سرغړونه کړې ده.

د حزب اسلامي امیر ګلبدین حکمتیار ادعا کوي، چې امریکا په افغانستان کې خپل فعال پوځي، استخباراتي او جاسوسي حضور روان ساتلی، چې ښايي د اسلامي امارت د ځینو مشرانو د وژلو پلان ولري. امارت باید د دا ډول بریدونو مخه ونیسي.

د حزب اسلامي مشر ګلبدین حکمتیار ويلي، امریکا له افغانستان څخه د جګړې د دوام په اراده وتلې او د غچ اخیستنې احساس د دغه هېواد د سیاسي او پوځي چارواکو له څرګندونو هم څرګندېږي.

نوموړی خبرداری ورکوي، چې د افغانستان هوايي حریم هم خوندي ندی او امریکا کولی شي خپل مخالفان په افغانستان او نورو ځایونو کې پر نښه کړي.

د امریکا حکومت ادعا کوي، چې ایمن الظواهري د تېرې شنبې پر ورځ په کابل کې د امریکا د بې پیلوته الوتکې په برید کې وژل شوی؛ خو د دې ادعا د ثابتولو لپاره یې اسناد وړاندې کړي ندي. اسلامي امارت د دغه برید پخلی کوي؛ خو تر اوسه یې په کابل کې د الظواهري د میشتېدو او د هغه د وژل کېدو په اړه څه ندي ویلي.

Continue Reading

Trending

Copyright © 2022 Ariana News. All rights reserved!