د پکتیا په یو شمېر ولسوالیو کې ولسوالانو صندوقونه ډک کړي

په پکتیا کې د ثبات او همپالنې د ولایتي ډلې غړي اندېښنه ښیي، چې ولایتي چارواکو د دولت جوړوو نکې ډلې پر پلوۍ په ټاکنو کې لاسوهنه کړې او په یو شمېر ولسوالیو کې ولسوالانو صندوقونه ډک کړي دي.

په پکتبیا کې د ثبات او همپالنې ولایتي ډلې غړي او ناظرین شکایت کوي، چې د دې ولایت په یو شمېر ولسوالیو کې حکومتي چارواکو د دولت جوړونکې ډلې پر پلوۍ په ټاکنو کې مداخله کړې او پرته له بایو میتریک يې یادې ډلې ته رایې کارولي.

دوی وايي، په یو شمېر ولسوالیو کې خلکو رایه نده کارولې؛ خو په سیمه کې د ولایتي ادارې په همغږۍ د ولسوالانو او امنیه قومندانانو لخوا صندوقونه ډک شوي او د دولت جوړونکې ډلې په ګټه یې رایه کارولې ده.

د پکتیاوالي شمیم خان کټوازی پر ځان لګیدلي تورونه رد وي او وایي، چې که څوک ښکاره ثبوت لري باید وړاندې یې کړي، چې قانوني چلند ورسره وشي.

په پکتیا کې د ټاکنیزو شکایتو کمیسون مشر مجاهد رحمت زي ويلي؛ له دوی سره تر ۵۳ پورې شکایتونه ثبت شوي، چې د ثبات او همپالنې د ټاکنیزې ډلې غړیو تر لس پورې د شکایتو پاڼې اخیستي؛ خو تر اوسه يې دوی ته شکایتونه ندي راوړي.

که څه هم د پکتیا د مرکز ګردیز او یو شمېر نږدې ولسوالیو د ټاکنیزو رايو صندوقونه ټاکنو کمیسون ته را رسیدلي؛ خو د ختیځو اووه ولسوالیو مواد اوس هم ندي را رسیدلي. د ټاکنو کمیسون ډاډ ښودلی، چې د دو شنبې تر شپې به راورسیږي.

خبریال:  فریدالله احمدزی