تازه خبرونه
د ملګرو ملتونو امنیت شورا پلاوی په ۳ ورځني سفر کابل ته راغلی
د ملي وحدت حکومت چارواکو په ډاګه کړې، چې په ملګرو ملتونو کې د امریکا د استازې نیکي هیلي په ګډون د ملګرو ملتونو د امنیت شورا د ۱۵ غړیو هېوادونو استازي کابل ته راغلي دي.
ویل کیږي، چې دغه لوړ پوړي چارواکي به د ملي وحدت حکومت له مشرانو، د ولسي جرګې او مشرانو جرګې له رییسانو او د ټاکنو کمیسیونونو له مشرانو سره لیدنه وکړي.
دغه راز د ملګرو ملتونو دا پلاوی به د افغانستان او پاکستان امنیتي او سیاسي حالت وارزوي.
دا د ملګرو ملتونو د امنیت شورا لومړنی جګپوړی پلاوی دی، چې افغانستان ته په درې ورځني سفر راځي.
کابل ته د ملګرو ملتونو د امنیت شورا د لوړ پوړي پلاوي له راتګ سره سم د ښاریانو پر مخ ارګ ته ورغلې لارې او شاوخوا سړکونه تړل شوي دي.
د سړکونو تړلو نه یوازې ترافیکو ته خنډونه پیدا کړي، بلکې ښاریانو ته یې بېلا بېلې ستونزې هم رامنځته کړې دي.
د کابل ښار د ترافیکو مدیریت په پلازمېنه کابل کې د روانې ګڼه ګوڼې او ځوږونو له کبله له خلکو په داسې حال کې بښنه غوښتې، چې د ترافیکو یوه برخه کورنیو چارو وزارت ښاروالۍ ته سپارلې ده.