د پنجشېر کانونو او پټرولیم رییس څرګنده کړې، چې د اسلامي امارت له واکمنۍ راوروسته په دې ولایت کې د کانونو غیر قانوني استخراج او قاچاق پای ته رسېدلی او د زمردو د قانوني او اصولي کان کېندنې لپاره مو تر اوسه له ۵۶۰ څخه ډېر جوازونه وېشلي دي.

د پنجشېر کانونو او پټرولیم رییس محمد قاسم امیري د کانونو او پټرولیم وزارت له چارسمبالي سره په کتنه کې زیاته کړې، چې له دې کار سره څه باندې لس زره پنجشېریانو ته د کار زمینه برابره شوې ده.

د کانونو او پټرولیم وزارت د خبرپاڼې له مخې؛ محمد قاسم امیري د پنجشېر د یاقوتو د ټولو کانونو د سروې او استخراج د جوازونو د وېش لپاره دې ولایت ته له دې وزارت څخه د سروې او تخنیکي ډلې د لېږلو غوښتنه وکړه.

په دې کتنه کې د کانونو او پټرولیم وزارت چارسمبالي شهاب الدین دلاور د پنجشېر خلکو ته د کاري فرصتونو په برابرولو او په دغه ولایت کې د یاقوت او زمرد د استخراج د جوازونو پر ورکولو ټینګار وکړ.

د بهرنیو چارو وزارت سرپرست امیر خان متقي ویلي؛ اسلامي امارت د افغانستان په اړه د ملګرو ملتونو پر ملاتړ د دوحې په درېیمه ناسته کې د معنا داره ګډون غوښتونکی دی.

امیرخان متقي دغه څرګندونې د افغانستان لپاره د اروپايي ټولنې له ځانګړي استازي ټوماس نیکلاسون سره په کتنه کې کړې دي.

د بهرنیو چارو وزارت لخوا په خپره شوې خبرپاڼه کې راغلي؛ امیر خان متقي په کابل کې د ملګرو ملتونو د سیاست او سولې په چارو کې د ملګرو ملتونو د عمومي منشي له مرستیالې رزماري این ډي کارلو سره د ترسره شویو ګټورو خبرو په رڼا کې ویلي، چې د دوحې په درېیمه ناسته کې ګډون د ارزونې په حال کې دی، چې له پایلو وروسته به په دې اړه وروستی دریځ اعلان شي.

هغه ویلي؛ د افغانستان اسلامي امارت پالیسي د نړۍ له ټولو هېوادونو سره د متوازن او مثبت تعامل پر بنسټ ولاړه ده او د دوحې په درېیمه ناسته کې د معناداره ګډون غوښتونکي دي، چې پایله یې د افغان ولس او هېواد د سوکالۍ سبب شي.

متقي ويلي، چې افغانستان له ۴۵ کلنې جګړې او بربادۍ وروسته اوس په بېلابېلو برخو کې د پام وړ مثبتې لاسته راوړنې لري.

ټوماس نیکلاسون د دوحې په درېیمه ناسته کې د اسلامي امارت د استازو د ګډون پر اهمیت ټینګار کړی او څرګندوي، چې په دې غونډه کې به پر مهمو مسایلو خبرې وشي.

نوموړي له متقي سره د لیدنې په اړه خپل نظرونه هم شریک کړل.

ټاکل شوې د افغانستان په اړه په دوحه کې درېیمه غونډه د جون پر دېرشمه جوړه شي.

د افغانستان اسلامي امارت د کنفرانس په تېر پړاو کې پخپلو غوښتنو د ټینګار له کبله له ګډون ډډه کړې وه.