رضا رفعت په کانکور ازموینه کې لومړی ځای خپل کړی

د ۱۳۹۵ ل کال د کانکور په ازموینه کې لومړی شوی رضا فکر کوي، چې د کورنۍ غربت او فقر ته یوازې د خپل تحصیل له لارې پای ورکولی شي. د رضا پلار په کابل ښاروالۍ کې د صفاکار دنده لري او په کرایي کور کې اوسیږي.

د کابل ښار د لویدیځ په کږو وږو لارو او کوڅو کې هغه زلمی اوسیږي، چې د دیارلس سوه پېنځه نویم کال د کانکو په عمومي ازموینه کې یې تر ټولو زیاتې نومرې وړي او بریالی شوی دی.

رضا رفعت د کار له مناسبو فرصتونو سره سره په درس او زدکړې تمرکز وکړ. ان تر دې، چې لیدلی خوب یې رښتیا شو.

رفعت د ښوونځي تر څنګ غالۍ اوبدلې او د شپې یې څلور ساعته خوب کاوه. رضا تر اوسه ګرځند (مبایل) نلري او په ټولنیزو رسنیو، فیسبوک او نورو کې هم نه دی فعال.

د کانکور ازموینې اول نومره رضا رفعت وایي؛ هره ورځ، چې له کاره به خلاص شو، ښوونځي ته به تلم، بیا به د شپې تر یوې نیمې دوه بجو به مې درس لوست. هیڅ شی؛ که انسان هڅه وکړي، مخه یې نیولی نشي.

هغه زیاتوي، په ژوند کې باید هر څوک موخه او هدف ولري.

 د رضا مور د خپل زوی بریا ته خوښه ده؛ خو سر له اوسه دې فکر وړې، چې د زوی تحصیل ته به پیسې له کومه کوي؟!

د رضا رفعت مور وایي، خپله یې ډېرې هڅې وکړې، چې درس ووایي او مونږ له دې بدبختیو وباسي.

پلار یې له شنه سهاره تر مازیګره په کابل ښاروالۍ کې د پاکارۍ دنده پر مخ بیايي او د میاشتې شپږ زره افغانۍ معاش تر لاسه کوي.

د رضا پلار عوض وایي، په کرایي کور کې اوسیږم؛ د میاشتې یونیم زر کرایه ورکوم، ۵۰۰ افغانۍ د اوبو او برښنا بل ورکوم. پاتې څلور زره افغانۍ اووه کسانو ته څه دي؟   

رضا په ځوانانو او زلمیانو غږ کوي، چې درس ولولي او هېواد له روانیو او ستونزو وباسئ.

خبریاله: لیدا نیازۍ