زلمي خلیلزاد په کابل کې له افغان چارواکو سره پر خپلمنځي خبرو وغږیده

د افغان سولې لپاره د امریکا ځانګړي استازي زلمي خلیلزاد په کابل کې له افغان چارواکو سره د سولې په اړه د افغانانو پر خپلمنځي خبرو غږیدلی دی.

د افغان سولې لپاره د امریکا ځانګړی استازی زلمی خلیلزاد په کابل کې د دوشنبې پر سهار( د وري ۱۲) له یو شمېر دولتي او جهادي مشرانو سره د افغانانو پر سوله خبرې وکړې.

خلیلزاد له اجرائيه رييس، بهرنیو چارو سرپرست وزیر، د سولې د عالي شورا د دارالانشا له رییس او د حکومت د مذاکراتي ډلې سره خبرې کړې او ویلي یې دي، چې د افغانانو خپلمنځي خبرو ته ډېره اړتیا ده.

اجرائيه رييس عبدالله عبدالله ویلي، چې له طالبانو سره د سولې د خبرو لپاره د هر اړخیز پلاوي پر ټاکل کیدو یې کار پیل کړی او تمه ده، چې د پلاوي له بشپړیدو سره به له وسلوالو طالبانو سره د سولې د خبرو زمینه برابره شي.

تمه ده چې له افغان چارواکو او سیاستوالو سره د زلمي خلیلزاد له خبرو وروسته به له وسلوالو طالبانو سره د خبرو داسې هر اړخیز پلاوی جوړ شي، چې سیاسي ډلې او حکومت به هم په کې ګډون ولري.

د سولې عالي شورا ویاند اسدالله زائیري وایي، چې داځل د حکومت او طالبانو نېغو خبرو ته زمینه برابریږي، چې دا نه یوازې د خلکو غوښتنه ده، بلکې د حل لار هم ده.

حکومت هم مني، چې امریکا او وسلوال طالبان په خپلو منځو کې پر ځینو مسایلو هوکړې ته رسیدلي؛ خو د اوربند او د افغانانو د خپلمنځي خبرو په اړه پرمختګ ندی شوی.

د افغانانو خپلمنځي غونډه به د اپریل په نیمايي کې د قطر په کوربتوب جوړه شي؛ خو له دې ناستې مخکې به طالب استازي او زلمی خلیلزاد د شپږم ځل لپاره سره جرګه کیږي.

پخوانی طالب چارواکی سید اکبر اغا وایي؛ کیدی شي په شپږمه ناسته کې دوی نور پرمختګ وکړي او د تېرو هوکړو پلي کولو ته زمینه برابره شي.

اجرائيه رييس له وسلوالو طالبانو سره د سولې له هوکړې وروسته د لنډمهالي ادارې له جوړښت سره هم مخالفت ښودلی او حکومت هڅې پیل کړي، چې سیاسي ډلې او مخورې څېرې راټولې کړي او له طالب استازیو سره د سولې په خبرو کې یو موټی دریځ خپل کړي.

خبریال: باعث حیات