په کابل ګرینډ هوټل کې د دوحې بهیر د خصوصي سکټور د کاري ډلې درېیمه غونډه په حضوري او انلاین بڼه د افغانستان لپاره د ملګرو ملتونو د مرستندویه پلاوي(یوناما) پر کوربتوب ترسره شوه.

په دې غونډه کې د افغانستان اسلامي امارت استازو د بهرنیو چارو، مالیې، صنایعو او سوداګرۍ، اقتصاد، کار او ټولنیزو چارو وزارتونو او همدارنګه د افغانستان بانک استازو ګډون درلود.

پر دې سربېره د یوناما، ملګرو ملتونو، نړیوالو او سیمه‌ییزو بنسټونو، سفیرانو، ډیپلوماټانو او د خصوصي سکټور کارپوهانو هم ګډون کړی و.

غونډه په دوه برخو کې ترسره شوه؛ لومړۍ برخه پر ودې او ګډون راوڅرخېده او په دوه‌یمه برخه کې پر همغږۍ او رڼښت خبرې وشوې.

د افغانستان اسلامي امارت استازو د امارت له واکمنېدا وروسته لاسته راوړنې او پرمختګونه وړاندې کړل او ګډونوالو د اړوند هڅو د ستاینې تر څنګ د خصوصي سکټور د ملاتړ او همکاریو د پیاوړتیا پر اړتیا ټینګار وکړ.

په روسیه کې د افغانستان سفارت ویلي، چې په دې هېواد کې افغان سفیر ګل حسن حسن د دوشنبې پر ورځ( د سلواغې شلمه ) په مسکو کې د افغانستان اسلامي امارت سفیر او ځانګړي استازي ګل حسن حسن له روسیې میشتو افغان سوداګرو سره د سوداګریزو اړیکو پر پیاوړتیا خبرې کړې دي.

د یاد سفارت په خپره شوې خبرپاڼه کې راغلي: په دې کتنه کې، چې د سفارت یو شمېر ډیپلوماټانو هم  ګډون درلود؛ د متقابل تفاهم، همغږۍ او اقتصادي اړیکو پر پیاوړتیا سربېره د افغانستان او روسیې د اړوند سوداګریزو ستونزو په اړه هم خبرې شوې دي.

ګل حسن حسن افغان سوداګر په هېواد کې پانګونې ته وهڅول او دا یې د هغوی ملي دنده وبلله.

نوموړي افغان سوداګرو ته ډاډ څرګند کړ، چې سفارت د سوداګریزو چارو په برخه بشپړه همکاري کوي.

ویل کیږي، چې روسیې میشتو افغان سوداګرو هم په بېلابېلو برخو کې خپلې ستونزې، اندېښنې او وړاندیزونه وړاندې کړل او د اسلامي امارت له اړوند ادارو یې د اغېزمن ملاتړ، همکارۍ او پاملرنې غوښتنه وکړه.

د روسیې بهرنیو چارو وزیر سرګې لاوروف ويلي، چې د افغانستان په سرحدونو او د هند-پاکستان-افغانستان په منځنیو سیمو کې اوس هم ترهګریز فعالیتونه لیدل کېږي.

لاوروف په روسیه کې له بریکس ټلویزیون سره د مرکې پر مهال د منځني ختیځ روانو اندېښنو ته په نغوته(اشاره) کې د آسیايي سیمو اړوند اندېښنې هم پر ګوته کړې دي.

هغه د ملګرو ملتونو په چوکاټ کې له هند سره د همکاریو د ترسره کولو لپاره د ترهګرۍ ضد نړیوال کنوانسیون پر اړتیا هم ټینګار وکړ.

لاوروف ویلي؛ که څه هم د دې کنوانسیون مسوده مخکې چمتو شوې، خو تر اوسه یې د تصویب لپاره اجماع رامنځته شوې نده.

روسیې پر ځلونو د افغانستان له لوري د وسلوالو ګواښونو په اړه خپلې اندېښنې څرګندې کړي؛ خو اسلامي امارت بیا دا اندېښنې رد کړي او څرګندوي، چې د افغانستان خاوره به د هیچا پر ضد ونه کارول شي.