تازه خبرونه
په کابل کې چاودنو د خبریالانو په ګډون له ۲۵ کسانو خوږ ژوند واخیست
د کابل په شش درک سیمه کې د دوشنبې پر سهار اته بجې(د غویی۱۰) دوه غبرګو چاودنو د کابل شنه سیمه ولړزوله، چې لږ تر لږه یې د ۲۵ کسانو خوږ ژوند واخیست او له۴۰ ډېر کسان یې ټپیان کړل.
له راپورونو سره سم لومړی د شش درک پر سړک د ملي امنیت یوې پوستې ته نږدې د موترسایکل په کارولو ځانمرګی برید وشو، چې له کبله یې څلورو کسانو خپل خوږ ژوند له لاسه ورکړ او یو شمېر نور ټپيان شول؛ خو وروسته، چې د ټپيانو او جسدونو د انتقال لپاره سیمې ته امنیتي ځواکونه، ځان ژغورونکي او ژورنالیستان ورسیدل، دوه یمه چاودنه وشوه، چې په کې د خبریالانو په ګډون عامو خلکو ته درنده مرګ و ژوبله ورسیده.
د عامې روغتیا وزارت ویاند وحیدالله مجروح وایي: په دې چاودنو کې لږ تر لږه ۲۱ کسانو خپل خوږ ژوند له لاسه ورکړی او ۲۷ نور ټپیان دي.
د نوموړي په وینا؛ د دواړو چاودنو د ډېرو ټپیانو روغتیایي حالت د اندېښنې وړ دی.
د نی اجرئیه رییس مجیب خلوتګر د څرګندونو له مخې؛ په دوه یمه پېښه کې ۸ خبریالانو ژوند له لاسه ورکړی دی، چې یو په کې د فرانس پریس آژانس انځورګر خبریال شاه مری فیضي، د یک تلویزون خبریال غازي رسولي، د آزادۍ رادیو خبریال عبادالله حنانزي، د ژوندون تلویزون خبریال توخي، د طلوع نیوز یوه عکاس او ځیني نور خبریالان په ټپیانو او وژل شویو کې یاد شوي دي.
دغه راز د خبریالانو فیدراسیون د سباوون کاکړ وژل کیدل هم تائید کړي، چې ټول ۹ خبریالانو په دې دواړو پېښو کې ژوند له لاسه ورکړی دی. دغه راز د یو پرېکړه لیک په لوستلو یې دغه پېښه وغندله، د غویی لسمه یې خونړۍ ورځ ونوموله او د می په درېیمه یې د دغو قربانیانو د فاتحې ورځ اعلان کړه.
کورنیو چارو وزارت خپاره شوي ځاني زیانونه منلي او وایي، چې د لومړني برید ګر موخه په سیمه کې د امنیتي ځواکونو د ګنډونکیو خونه وه؛ خو دوه یم بریدګر د خبریالانو په جامه کې پر عامو خلکو او خبریالانو ځانته چاودنه ورکړې ده.
سرچینې زیاته کړې، چې په لومړۍ چاودنه کې څلور امنیتي ځواکونو هم خپل ژوند له لاسه ورکړی دی.
د کابل پولیسو ویاند حشمت ستانکزي هم د ۲۱ کسانو وژل کیدل منلي او وایي، چې له ۴۰ ډېر کسان په دواړو ځانمرګو بریدونو کې ټپیان شوي دي.
نوموړي دغه راز ویلي، چې په لومړۍ چاودنه کې بریدګر یو موتر سایکل کارولی دی.
هغه دغه راز د دوه یمې چاودنې رامنځته کیدل هم منلي؛ خو وایي، چې د دې چاودنې بڼه تر دې دمه څرګنده شوې نه ده.
ویل کیږي، چې دوه یمه چاودنه هغه مهال رامنځته شوه، چې خبریالان او عام وګړي د پېښې ځای ته نږدې راټول شوي وه.
د ځینو بهر نیو رسنیو د څرګندونو له مخې؛ د دواړو پېښو مسوولیت داعش پرغاړه اخیستی دی.
تازه خبرونه
د افغانستان په خاوره کې د ټي ټي پي د شتون په اړه شواهد لرو – د پاکستان پوځ
د پاکستان پوځ یو ځل بیا ادعا کړې، چې تحریک طالبان پاکستان د افغانستان خاوره کاروي او په دې اړه کوټلي شواهد شته.
د پاکستان پوځ ویاند احمد شریف چوهدري نن سېشنبه د غویی اتلسمه) په یوه خبري غونډه کې ویلي، چې په پاکستان کې د وروستیو ترهګریزو پېښو ریښه په افغانستان کې ده.
هغه ټینګار کړی، چې پاکستان د ترهګرۍ ضد هڅو ته ژمن دی او د ټي ټي پي د له منځه وړلو لپاره به هره شونې لار وکاروي.
نوموړي زیاته کړې؛ د پاکستان امنیتي ځواکونه به د ترهګرو پر وړاندې تر هغه ځایه، چې شونې وي مخکې ولاړ شي.
چوهدري د عاملینو د محاکمې تر څنګ ویلي: د ستر درستیز د څر\ندونو له مخې ترهګر په پاکستان کې ځای نلري.
د پاکستان د پوځ ویاند د افغان کډوالو د مسئلې په اړه ویلي: په میلیونونو افغانان اوس هم په پاکستان کې اوسیږي. په داسې حال کې، چې له ترهګرۍ سره مبارزه کوي. پاکستان له افغان کډوالو سره مرسته کړې او نړۍ هم پرې پوهېږي.
هغه زياته کړې؛ په پاکستان کې د افغان وګړو د شتون له کبله د قانون او نظم وضعيت خراب شوى او تر اوسه له ٥٦٣ زره ډېر افغانان خپل هېواد ته ستانه شوي دي.
دا څرګندونې په داسې حال کې کېږي، چې له دې مخکې اسلامي امارت په افغانستان کې د تحریک طالبان پاکستان شتون رد کړی او څرګندوي، چې د پاکستان امنیتي ستونزه له افغانستان سره هیڅ تړاو نلري.
تازه خبرونه
د وزیرانو له اطاعت خوښ یم – د اسلامي امارت رهبر
د افغانستان اسلامي امارت رهبر د دوشنبې پر ورځ د غویی اووه لسمه د کندهار د دیني علومو او جامعاتو چارو د انسجام او تنظیم په درې ورځني سیمینار کې ویلي، چې د اسلامي امارت له رامنځته کېدو راپدیخوا ټول مخالفان بښل شوي او یو له بل سره د وروڼو په څېر ژوند کوي.
شیخ هبة الله اخوندزاده زیاته کړې، چې د چارسمبالو وزیرانو له کړنو راضي دی؛ ځکه، چې تل ترې اطاعت کوي.
هغه ویلي: زه له خپلو وزیرانو خوښ یم او دوی ښه خلک دي او تل زما اطاعت کوي. د هغوی اطاعت، درناوی او احترام وکړئ؛ ځکه، چې عزت او اطاعت یوازې د امیر لپاره ځانګړی ندی، بلکې ټول قومندانان ترې برخمن دي.
د اسلامي امارت رهبر دا هم ویلي: کفري نړۍ غواړي، چې سیاست له دین څخه بېل کړي؛ نو په اسلامي هېوادونو کې هم باید علما په سیاست کې رول ونلري، خو په افغانستان کې باید علما سیاست ته لاسرسی ولري.
نوموړي له عالمانو وغوښتل، چې د اسلامي امارت د احکامو په پلي کولو او اطاعت کې دې ولس وهڅوي.
د لوړو زدهکړو وزارت ویاند ضیاء الله هاشمي وايي، دغه درې ورځنی سیمنار د شنبې پر ورځ د غویی پر پېنځلسمه د لوړو زدهکړو وزارت د چارسمبالي ندا محمد ندیم پر وینا پیل او د دوشنبې پر ورځ د غوایی اووهلسمه پای ته ورسېد.
تازه خبرونه
په افغانستان کې د قزاقستان د سوداګرۍ خونه پرانیستل شوه
د افغانستان صنایعو او سوداګرۍ وزارت څرګنده کړې، چې د افغانستان په هرات ولایت کې د قزاقستان د سوداګرۍ خونه پرانیستل شوه.
د دغه وزارت په خبرپاڼه کې، چې نن سې شنبه د غویی اتلسمه خپره شوې راغلي، چې د صنایعو او سوداګرۍ وزارت چارسمبالي نورالدین عزیزي په افغانستان کې د قزاقستان د سوداګرۍ خونې پرانیستل د دواړو هېوادونو ترمنځ د سوداګریزو اړیکو د پیاوړتیا او پراختیا په برخه کې یو مثبت او اغېزمن ګام وباله.
یادې خونې د پرانیستې پر مهال نورالدین عزیزي څرګنده کړې، چې د افغانستان د رسمي پلاوي او خصوصي سکټور د سوداګریزو اړیکو کنفرانس، دوه اړخیزو سوداګریزو غونډو او پر ۱۴۰۲ کال د قزاقستان په استانه ښار کې د افغانستان د محصولاتو او تولیداتو له نندارتون وروسته قزاقستان ته د افغانستان صادرات زیات شوي دي.
د قزاقستان د سوداګرۍ خونې مشر ارمان یوسینتایوف ټینګار کړی، چې د دې خونو له پرانیستلو څخه هدف د دواړو هېوادونو ترمنځ د سوداګرۍ د حجم او ارزښت لوړول دي؛ ځکه، چې قزاقستان له اسلامي امارت سره د اړیکو او سوداګرۍ پراختیا ته لیوالتیا لري.
-
تازه خبرونه3 days ago
په غور کې د سېلابونو له کبله سلګونه خلک بې ځایه شول
-
تازه خبرونه3 days ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه3 days ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
نړۍ2 days ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه2 days ago
د اسلامي همکاریو ټولنې سرمشریزې په افغانستان کې د نجونو پر زدهکړو ټینګار څرګند کړ
-
سوداگري3 days ago
د ترکمنستان د سوداګرو او صنایعو اتحادیې مشر هرات ته سفر وګړ
-
لوبی2 days ago
ابو مسلم فراه افسي میوند فوټبال لوبډلې ته ۹ پر ۱ ماتې ورکړه
-
نړۍ1 day ago
د غزې په جګړه کې مو د مصر او قطر د اوربند وړاندیز منلی – حماس