د افغانستان اسلامي امارت د استخباراتو عمومي ریاست د یکشنبې پر ورځ ( د وري شپږمه ) څرګنده کړې، چې په بلخ کې یې د یو لړ ځانګړیو عملیاتو پر مهال د داعش درې مهم غړي وژلي دي.

د یاد بنسټ د څرګندونو له مخې؛ د داعش ډلې پخوانی والي او دوه‌یم نمبر مشر مولوي ضیاءالدین، د خراسان څانګې د شورا غړی ابو عمر افریدی او د داعش د پوځي روزنې مسوول استاد سلمان تاجکستانی له منځه وړل شوي دي.

د استخباراتو عمومي ریاست ويلي، مولوي ضیاءالدین له شهاب المهاجر مخکې د خراسان لپاره د داعش والي او د اداري او قضايي چارو مسوول و.

د استخباراتو ریاست ویلي، چې استاد سلمان د تاجکستان تبعه او د پوځي روزنې او چاودیدونکیو توکو په جوړولو کې څانګوال او متخصص و.

دغه ځانګړي عملیات له تېرې یوې اوونۍ راپدیخوا په بلخ ولایت کې د داعش پر ضد د اسلامي امارت دوه‌یم عملیات دي.

د اسلامي امارت ویاند ذبیح الله مجاهد د تېر کال د کب میاشتې پر اووه ویشتمه نېټه ویلي وه، چې په مزارشریف ښار کې د داعش پر درې پټنځیو برید شوی دی.

د افغانستان اسلامي امارت د استخباراتو عمومي ریاست هم د یکشنبې پر ورځ ( د وري شپږمه ) په ډاګه کړه، چې په فاریاب کې یې د داعش هغه وسله‌وال نیولي، چې د بلخ والي داوود مزمل په وژلو کې یې لاس درلود.

د دغه رياست د څرګندونو له مخې، دغو کسانو په کابل، بلخ او فارياب په بريدونو کې لاس درلود.

دا په داسې حال کې ده، چې د اسلامي امارت د استخباراتو عمومي ریاست د کابل ښار د دولسمې امنیتي حوزې د اړوند سیمې په ځانګړیو عملیاتو کې د داعش د هغه غړی وژل تائید کړل، چې د کورنیو چارو وزارت پر جومات یې د برید مشري کړې وه.

د ایران رسمي خبري آژانس ایرنا راپور ورکړی، چې د جمعې پر سهار د ایران په شمال لویدیځ کې د رښتر ۵.۶ درجې زلزلې د ټپیانو شمېر ۱۶۵ کسانو ته رسیدلی دی.

د ایران د زلزلې ثبتولو مرکز څرګنده کړې؛ دا زلزله تېره ورځ پر سیمه ییز وخت د سهار پر ۶:۴۶ دقیقو د لویدیځ آذربایجان په یزدګان خوی برخه کې د اته کیلومتره پر ژوروالي رامنځته شوې ده.

ایرنا د لویدیځ آذربایجان د والي محمد صادق معتمدیان د څرګندونو له مخې ویلي؛ له ۱۶۵ ټپیانو څخه ۱۳۹ یې له لومړنیو مرستو وروسته روغتیايي مرکزونو رخصت کړي او پاتې نور تر درملنې لاندې دي.

د لويديځ آذربايجان د استوګنې بنسټ مشر جعفر برزګر ايرنا ته ويلي، چې د زلزلې له کبله د سلماس او خوي د ولايتونو په لس کليو کې د استوګنې ٨٠ کورونه زيانمن کړي دي.

د یادونې ده، چې دا زلزله د شرقي آذربایجان او ارومیه ښارونو کې هم احساس شوې ده.

د جنورۍ په وروستیو کې د رښتر پر کچه ۵.۹ درجې زلزلې خوی ولایت ولړزاوه، چې درې کسان یې مړه او له ۸۰۰ ډېر نور ټپیان شول.

د افغان بیسیم مخابراتي شرکت (AWCC) روانه اوونۍ په کندهار ښار کې د پېرودونکیو د پرلپسې غوښتنو له کبله د سیمکارتونو د خرڅلاو او خدماتو د وړاندې کولو د اوومې څانګې پرانیسته وکړه.

د افغان بیسیم مخابراتي شرکت مسوولين وايي؛ دوی هڅه کوي، چې د جنوب غرب زون د اوسيدونکیو لپاره ډېر نور او ښه مخابراتي خدمات وړاندې او د دوی ستونزې حل کړي .

دغه راز د افغان بيسيم مخابراتي شبکې مسوولينو ويلي؛ دوی هڅه کوي، چې خپل خدمتونه د کندهار لرې پرتو سيمو ته هم وغزوي.

په سویل لويديځه حوزه کې د افغان بيسيم مخابراتي شرکت ریيس سيد نوراحمد شاه آغا وایي: دا به يوازې په کندهار پورې محدود نه وي، بلکې مونږ د هلمند، روزګان او زابل په ولايتونوکې هم خدماتي څانګې ډېرې کړې او نورې به هم زياتوو؛ ځکه، چې مونږ باید د خلکو هغه حجم او هغه ضرورتونه په نظر کې ونيسو، چې له مخې یې خپلو خدماتي څانګو ته پراختيا ورکړو .

د کندهار سيميزو مشرانو په کندهار ښار کې د افغان بيسيم د خدمتونو د نوې څانګې په پرانستل کېدو خوښي څرکنده کړې او د ډېرو نورو خدمتونو او آسانتياوو د برابرولو غوښتنه يې وکړه .

د کندهار ولايت مقام د بشري سرچينو ریيس مفتي ميرزامحمد زاهد وایي: ۹۹ فيصده خلک د افغان بیسیم شبکې سيمکارتونه استعمالوي. دا يو فيصد که درته ووايمه، چې هغه دا نورې شبکې استعمالوي؛ نو ستاسې لپاره هم دا په کار ده، چې د خپل ولس لپاره نورې آسانتياوې هم رامنځته کړئ.

د کندهار مخابراتو رياست چارواکو خوښ دي، چې د افغان بيسيم مخابراتي شرکت له لوري د کندهار وروستۍ ولسوالي ریګستان هم تر پوښښ لاندې راوستل شوې او دا د دې ولايت لپاره لويه لاسته راوړنه بولي .

د کندهار د مخابراتو ریيس ملا نورالله نوري وایي: دلته ډېرې ولسوالۍ له خدماتو بې برخې وې. اوس الحمدالله  مونږ داسې ولسوالۍ په کندهار ولايت کې نلرو، چې هغه دې له خدماتو بې برخې وي. دا يوه د ریګستان ولسوالي پاتې وه، چې له ساحې څخه ډېره لرې وه. الحمدالله وتوانېدو، چې هلته هم مخابراتي خدمات رامنځته او د خلکو اړتیاوې پوره شي.

د يادونې وړ ده، چې د کندهار په دوه‌یمه ناحيه کې د افغان بيسيم د خدمتونو نوې پرانستل شوې څانګه د نرينه وو او ښځينوو لپاره جلا جلا برخې لري .