له ټاکنو کمیسیون څخه دې محمد حنیف دانشیار ګوښه شي- نبیل، حکمتیار او عبدالله

د عبدالله عبدالله، ګلبدین حکمتیار او رحمت الله نبیل ټاکنډلو له لویې څارنوالۍ غوښتي، چې د ټاکنو خپلواک کمیسیون کمیشنر حنیف دانشیار تر عدلي څارنې لاندې ونیسي او د کار له دوامه یې را وګرزوي.

د ټاکنو خپلواک کمیسیون کړنې تل تر جدي څار لاندې دي؛ خو دا ځل د (ثبات او همپالنې) د (سولې او اسلامي عدالت) او (امنیت او عدالت) ټاکنډلو ویلي، چې د ټاکنو خپلواک کمیسیون کمیشنر حنیف دانشیار پېنځه دېرش کلني ته ندی رسیدلی او د جعلي اسنادو له مخې دې بنسټ ته غوره شوی دی.

د سولې او اسلامي عدالت د ټاکنډلې دوه یم مرستیال عبدالرحمان نقي ټینګار کوي، چې ښاغلي دانشیار پېنځه دېرش کلني نده بشپړه کړې او د جعلي اسنادو له مخې یې د ټاکنو خپلواک کمیسیون د غړيتوب ویاړ تر لاسه کړی دی.

د امنیت او عدالت ټاکنډلې غړی مطیع الله ابراهیم زي څرګنده کړې؛ ټاکنډلې اوس پوهیدلي؛ خو دا د حکومت مسوولیت دي، چې اسناد یې ارزولي وای. دې کار د کمیسیون حقوقي او قانوني مشروعیت تر پوښتنو لاندې راوستی دی. څومره پرېکړې، چې دانشیار لاسلیک کړي، ټولې باطلې دي.

دې ټاکنډلو په یوه ګډه غوښتنه کې له لویې څارنوالۍ وغوښتل، چې دانشیار تر عدلي او قضایي څار لاندې ونیسي.

د ثبات او همپالنې ټاکنډلې غړي عبدالرحمان اخلاقي ویلي؛  سړي د ۳۵ کلنۍ منګ(عمر) پوره کړی ندی؛ خو په جعلي اسنادو غوره شوی دی. له لویې څارنوالۍ غواړو، چې دندې ته یې له تګه راوګرزوي او د جزا د کود له مخې تر عدلي څار لاندې ونیول شي.  دا په داسې حال کې ده، چې د ټاکنو خپلواک کمیسیون ویاي؛ د دې بنسټ ټول غړي د قانون له مخې غوره شوي دي.

د ټاکنو خپلواک کمیسیون کمیشنر اورنګزیب وايي؛ ښه به وه، چې  رامنځته شوې ستونزه ۵ یا شپږ میاستې مخکې خلکو ته وړاندې شوې وه، نه په دې حساس وخت کې.  فکر کړم، چې د ټاکنو خپلواک کمیسیون خپل ناپېیلتوب خوندي کوي او د هیچا د فشار او دسیسو لاندې نه راځي.

  په همدې حال کې ټاکنو خپلواک کمیسیون په پاتې شپږ ولایتونو کې د رایو بیا شمېرنه بشپړه کړې او د بغلان ولایت رایې د بیا شمېرلو په حال کې دي، چې وروسته به د بیا شمېرل شویو رایو د پایلو فورمې د معلوماتو په مرکزي بانک کې ځای پرځای او بیا به د ولسمشریزو ټاکنو لومړنۍ پایله اعلان شي.