ولې ځینې ونې له ۱۰۰۰ کلونو ډېر ژوند کولی شي؟

څېړونکیو موندلې، چې ځینې ونې کولی شي له زر کلونو ډېرې ژوندۍ پاتې شي.

په امریکا او چین کې ساینس پوهانو پر جینګو نومی ونې ، چې عمر یې له ۱۵ څخه تر ۶۶۷ کلونو پورې دی؛ څېړنې کړي او وموندلي یې دي، چې له لویدو س ره سره په کې د کمزورۍ نښې نښانې لیدل شوې ندي او ونې وده کوي.

د عمر ډېروالی او نورې ځانګړتیاوې یې لکه: د پاڼې کچه، د فوتو سنتیز وړتیا  او د تخم  کر یې له څرنګوالي او بدلون سره تړاو نلري.

څېړونکیو همدارنګه د جنیتیکي بدلونونو شونتیاوو ته پاملرنه کړې ده. دوی یې له لرګیو، پوټکو او ونو څخه د استخراج شویو حجرو پرتله کړې او ښیي، چې په بیولوژیکي جينونو کې یې د عمر پر تېریدو هیڅ راز بدلون ندی راغلی.

څېړنې ښيي؛ دغه ونې یو ډول کیمیاوي توکي ترشح کوي، چې د بهرنیو اغېزو لکه ناروغیو او وچکالیو سره ترې مقاومت رامنځته کیږي او د ډېرو نورو نباتاتو په پرتله د دې ونو جینونه د ځوانۍ تر وخته نه بدلیږي او د بېلابېلو اغېزو څخه په امان کې پاتې وي.

چین د جینګو ونو پلارنی ټاټوبي دي. دغه ونې پلنې پاڼې لري، چې په مني کې ژیړ رنګ خپلوي او سربېره پر دې فوسیلونه یې، چې د داینا سور تر زمانې رسیږي؛ د عمر پر اوږدیدو یې دلالت کوي.

په هر حال، یو شمېر جینګو ونې تر ۳۰۰۰ کلونو پورې عمر لري او د نړۍ په پارکونو او باغونو کې موندل کیږي؛ خو نسل یې د ورکیدو په درشل کې دی.