لویه څارنوالي هغه دوسیې پڅې څېړي، چې سیاسي بڼه لري- څار څېړونکي

د افغانستان روڼتیا څار څېړونکيو ویلي، چې په تېرو پېنځه کلونو کې د ملي وحدت حکومت د کابینې د ځینو پخوانیو وزیرانو د فساد له شل دوسیو څخه یوازې یوه څېړلې ده.

لویه څارنوالي، چې د فساد مخنیوي په برخه کې کار کوي او د فساد دوسیې یې څېړلي؛ خو اوس یې کارونه د نړیوالو او ملي بنسټونو تر څار لاندې راغلي دي.

ځینې بنسټونه وایي، د لویې څارنوالۍ چارې اوس لږ سیاسي شوې دي.

د افغانستان رونټیا څار څېړونکی ناصر تیموري ویلي، چې په تېرو پېنځه کلونو کې د ملي وحدت حکومت د کابینې د ځینو پخوانیو وزیرانو د فساد له شل دوسیو یوازې یوه څېړلې ده.
د نوموړي د څرګندونو له مخې؛ څارنوالۍ هغه دوسیې پڅې څېړي، چې سیاسي بڼه لري.

لویه څارنوالي بیا ویلي، د لسګونه جګپوړو چارواکو د فساد په تړاو پوښتنې ګرویګنې شوي او په یو کال کې یې ډېر کار کړی دی.

د لویې څارنوالۍ ویاند جمشید رسولي ټینګار کړی، د لسګونه جګپوړیو امنیتي چاروړاکو او پخوانیو وزیرانو دوسیې څېړل شوي او ځینې وزیران محاکمو ته را کښل شوي هم دي.

په ولسي جرګه کې د روزګان استازې ریحانه آزاد بیا د لویې څارنوالۍ له کړنو راضي نه ښکاري او  وایي، چې ډېرې دوسیې یې  سیاسي بڼه لري.

مخکې له اداري فساد سره د مبارزې د څارنې او ارزونې ګډې خپلواکې کمیتې په خپل پېنځم راپور کې ویلي وه، چې د فساد په ضد مبارزه کې د لویې څارنوالۍ کړنې د رضایت وړ دي.