تاجیکستان در پی بدتر شدن وضعیت امنیتی در شمال افغانستان،هزاران سرباز دیگر را در مرز خود با افغانستان مستقر می‌کند.  

ریاست جمهوری تاجیکستان گفته است که امام علی رحمان، رییس جمهور این کشور در یک نشست شورای امنیت ملی به ارتش دستور داده است تا ۲۰هزار نظامی دیگر را در مرز با افغانستان جابجا کند.

رییس جمهور تاجیکستان همچنان با رییسان جمهور ازبیکستان و قزاقستان نیز در باره وضعیت امنیتی افغانستان گفتگو کرده است.

دوشنبه می‌گوید، در این گفتگوها وضعیت مرزهای افغانستان با کشورهای آسیای میانه، متشنج ارزیابی شده و سران سه کشور با نگرانی از وضعیت افغانستان، بر همکاری‌های مشترک برای تقویت حفاظت مرزی از بهر جلوگیری از تهدیدها پافشاری کرده اند.

این در حالی است که بیش از هزار سرباز نیروهای امنیتی و دفاعی افغان روز گذشته (یکشنبه، ۱۳ سرطان) در پی حملات طالبان در بدخشان به خاک تاجیکستان پناه بردند.

آکیپرس گزارش کرده است که این سربازان پس از آن فرار کرده اند که طالبان ولسوالی‌های خووهان، شکای، نوسی، مایمی، شغنان، و اشکاشم را تصرف کردند.

این رسانه افزوده که ۱۰۳۷ تن از نیروهای امنیتی به تاجیکستان پناه برده اند.

این درحالی است که به اساس گزارش‌ها هفته گذشته نیز ۳۰۰ سرباز افغان در پی درگیری‌های شدید با طالبان به تاجیکستان پناه برده اند.