متقی: هیچ‌کس نمی‌تواند به روابط دوستانه میان افغانستان و تاجیکستان آسیب برساند

سعدی شریفی، سفیر تاجیکستان در کابل، با امیرخان متقی، وزیر امور خارجه امارت اسلامی افغانستان، دیدار و گفتگو کرده است.

طبق خبرنامه وزارت امور خارجه، در این دیدار، آقای متقی ضمن اشاره به توسعه روابط دیپلوماتیک و رفت و آمد هیأت‌های دو کشور، بیان داشت که افغانستان و تاجیکستان به عنوان کشورهای همسایه، برادر و مسلمان با توجه به پیوندهای فرهنگی و زبانی مشترک، می‌توانند از فرصت‌های موجود برای گسترش مناسبات در همه سطوح، به ویژه همکاری‌های سیاسی، اقتصادی و تجاری استفاده نمایند.

وی افزود که هیچ‌کس نمی‌تواند به روابط دوستانه و فضای اعتماد میان دو کشور آسیب برساند و امارت اسلامی افغانستان تعهد قوی در زمینه گسترش هرچه بیشتر مناسبات با جمهوری تاجیکستان دارد.

سفیر تاجیکستان، آقای شریفی، نیز در خصوص آخرین پیشرفت‌ها و توافقات قبلی میان کابل و دوشنبه اطلاعات ارائه نمود. وی تأکید کرد که جمهوری تاجیکستان برنامه‌ها و پروژه‌های اقتصادی مهمی در مرز مشترک دو کشور دارد و با حسن نیت و بر اساس واقعیت‌های موجود، به دنبال گسترش مناسبات اقتصادی و همکاری‌های مستمر با افغانستان است.

در پایان، دو طرف در خصوص برگزاری کمیته مشترک اقتصادی، تقویت همکاری‌های مرزی و امنیتی، و برنامه‌های وزارت خارجه دو کشور در سال پیش‌رو تبادل نظر نمودند.