لوبی
آریانا ټلویزیون د آسیا فوټبال کنفډراسیون د جایزو مراسم پر ژوندۍ بڼه خپروي
د افغانستان فوټبال مینهوال کولی شي دغه مراسم پنجشنبه( د لړم اتهویشتمه / د نومبر نولسمه) د کابل پر وخت د مازیګر پر ۴:۳۰ له آریانا ټلویزیون څخه پر ژوندۍ بڼه وګوري.
د آسیا فوټبال کنفډراسیون – ۲۰۲۶بانکوک د جایزو مراسم پنجشنبه( د لړم اتهویشتمه / د نومبر نولسمه) ترسره کېږي، چې په کې به د ۲۰۲۵/۲۰۲۶ آسیا فوټبال غوره لوبغاړو، روزونکو او بنسټونو ته جایزې ورکړ شي.
د دغو کلنیو مراسمو دېرشم پړاو د تایلینډ په پلازمېنه بانکوک کې د« آکسرا کینګ پاور» په ټیاتر کې ترسره کېږي. دا مراسم به د کابل پر وخت د مازیګر پر ۴:۳۰ پیل شي.
آریانا راډیو ټلویزیون به دغه مراسم په ټول افغانستان کې پر ژوندۍ بڼه خپاره کړي، چې د هېواد فوټبال مینهوال وکولی شي د آسیا فوټبال دغه مهم مراسم پر ژوندۍ بڼه وګوري.
په دې مراسمو کې به د آسیا فوټبال د ۱۹ بېلابېلو برخو غوره څېرې او بنسټونه وستایل شي. دا برخې د لوبغاړو انفرادي لاسته راوړنې، روزنه، د فوټبال بنسټیز پرمختګ او د آسیا فوټبال کنفډراسیون د غړیو او سیمهییزو فډراسیونونو فعالیتونه رانغاړي.
د دغو مراسمو له مهمو برخو څخه یوه د آسیا د کال غوره لوبغاړي جایزه ده، چې د سعودي عربستان لوبغاړی سالم الدوسري چانس ترې د درېیم ځل لپاره برخمن کیږي او د دې جایزې پر ګټلو به د آسیا د فوټبال په تاریخ کې لومړی لوبغاړی شي، چې دغه جایزه درې ځله ګټي.
الدوسري، چې د آسیا د کال غوره لوبغاړي له جایزې دفاع کوي؛ د دغې جایزې د ګټلو لپاره له خپل هېوادوال فراس البریکان او د ایران د ملي لوبډلې له ګول ساتونکي علیرضا بیرانوند سره سیالي کوي.
د دغو مراسمو کوربهتوب به د تایلینډ دوه ویاندویان، اوتسادا پانیچکول او جیرادا یوهارا کوي.
دا مراسم به له داسې هنري پروګرام سره پیل شي، چې د تایلینډ دودیز کلتور له معاصر هنر سره یوځای کوي.
په دغو مراسمو کې د آسیا الماس جایزه د نرینهوو او ښځینهوو د فوټبال د کال غوره روزونکي جایزې، د آسیا د کال غوره فوټسال لوبغاړي جایزه او د آسیايي فوټبال کنفډراسیون د رییس جایزه د بنسټیز فوټبال د پراختیا لپاره هم شاملې دي.
دغه راز د آسیا د نرینهوو او ښځینهوو د کال غوره ځوان لوبغاړي او له آسیا بهر د لوبېدونکو غوره آسیايي نرینه او ښځینه لوبغاړو څلور نورې جایزې به هم اعلان شي؛ خو دغه جایزې به په یو لړ نورو مراسمو کې ورکړ شي.
د آسیا فوټبال کنفډراسیون جایزې د دې لویې وچې د فوټبال له مهمو کلنیو مراسمو څخه دي، چې په کې یې د فوټبال د ډګر او له هغه بهر د پام وړ لاسته راوړنو او فعالیتونو ستاینه کېږي.
د افغانستان فوټبال مینهوال کولی شي دغه مراسم پنجشنبه( د لړم اتهویشتمه / د نومبر نولسمه) د کابل پر وخت د مازیګر پر ۴:۳۰ له آریانا ټلویزیون څخه پر ژوندۍ بڼه وګوري.
لوبی
زیمبابوی په دوهیمه ټسټ لوبه کې افغانستان ته د ۵۷ منډو پر توپیر ماتې ورکړه
زیمبابوی په لومړۍ پاڼۍ کې ۳۳۹ منډې وکړې او په دوهیمه کې یې د ۹ لوبغاړو پر سوځېدا ۲۹۵ منډې جوړې کړې او افغانستان ته یې د ۴۱۸ منډو هدف وټاکه.
د زیمبابوی د کرکټ ملي لوبډلې په دوهیمه ټسټ لوبه کې له یوې نږدې او په زړه پورې سیالۍ وروسته د افغانستان کرکټ ملي لوبډلې ته د ۵۷ منډو پر توپیر ماتې ورکړه.
زیمبابوی په لومړۍ پاڼۍ کې ۳۳۹ منډې وکړې او په دوهیمه کې یې د ۹ لوبغاړو پر سوځېدا ۲۹۵ منډې جوړې کړې او افغانستان ته یې د ۴۱۸ منډو هدف وټاکه.
افغانستان په لومړۍ پاڼۍ کې ۲۱۷ منډې وکړې او په دوهیمه کې یې ښه لوبه وکړه او ۳۶۰ منډې یې جوړې کړې؛ خو په پای کې یې هدف پوره نهکړ او د ۵۷ منډو پر توپیر یې له زیمبابوې ماتې وخوړه.
له دې سره، زیمبابوی په دوهیمه ټسټ لوبه کې بریا خپله کړه؛ افغانستان هم د دوهیمې پاڼۍ له غوره توپوهنې سره- سره ونهشو کولی ټاکل شوی هدف پوره کړي.
لوبی
سرخپوشان خوافي د افغانستان فوټبال اتلانو لیګ نه ماتېدونکی اتل شو
د هرات دې لوبډلې په ۱۸ لوبو کې ۱۶ بریاوې او دوه مساوي پایلې خپلې کړې؛ ۵۰ امتیازونه یې ترلاسه کړل او د ۵۲ ګولونو پر وهلو او یوازې د ۱۳ ګولونو پر منلو یې د ۱۰ لوبډلو په لښتیلیک(جدول ) کې لومړی ځای خپل کړ.
د سرخپوشان خوافي فوټبال لوبډلې د یوې ځلانده او له ماتې پرته سیالۍ پر پای ته رسولو، د افغانستان فوټبال اتلانو لیګ روشن د شپږم پړاو اتلولي وګټله او د دې سیالیو د اتلولي جام یې خپل کړ.
د هرات دې لوبډلې په ۱۸ لوبو کې ۱۶ بریاوې او دوه مساوي پایلې خپلې کړې؛ ۵۰ امتیازونه یې ترلاسه کړل او د ۵۲ ګولونو پر وهلو او یوازې د ۱۳ ګولونو پر منلو یې د ۱۰ لوبډلو په لښتیلیک(جدول ) کې لومړی ځای خپل کړ.
سرخپوشان خوافي د سیالیو له پیله خپل ځواک وښود او په لومړیو نهه لوبو کې یې پرلهپسې بریاوې ترلاسه کړې او د لښتیلیک په سر کې یې خپل ځای ټینګ کړ.
د دې لوبډلې اتلولي د نومبر پر یوولسمه خراسان فاریاب ته د ۷ پر صفر پر لوړه پایله له ماتې ورکولو وروسته یقیني شوه. دغې لوبډلې په خپله وروستۍ لوبه کې هم عمر زواک ته د ۷ پر ۴ په پایله کې ماتې ورکړه.
ابومسلم فراه د ۴۴ امتیازونو پر ترلاسه کولو دوهیم او طوفان هرات د ۳۲ امتیازونو پر ترلاسه کولو درېیم ځای خپل کړ.
آریانا خوست؛ د سیالیو د وروستۍ لوبې ګټونکې
د سیالیو په نوییمه او وروستۍ لوبه کې، چې د دوشنبې پر ورځ( د لړم پنځهویشتمه / د نومبر پر شپاړلسمه ) د افغانستان فوټبال فډراسیون د کابل په لوبغالي کې ترسره شوه؛ آریانا خوست لوبډلې عینو مېنې ته ۳ پر ۱ ماتې ورکړه.
له دې لوبې وروسته د پای مراسم او د اتلولۍ جام د سپارلو لړۍ ترسره شوه او د افغانستان فوټبال اتلانو لیګ روشن شپږم پړاو رسمي پای ته ورسېد.
د دې پړاو سیالۍ د هېواد له بېلابېلو ولایتونو څخه د ۱۰ لوبډلو پر ګډون او د ۹۰ لوبو پر ترسره کېدا له دوه میاشتو ډېرې روانې وې.
د آریانا راډیو ټلویزیون هم د دې سیالیو ټولې لوبې په افغانستان کې پر ژوندۍ او ځانګړې توګه خپرې کړې، چې د هېواد د فوټبال مینهوال د سیالیو له بهیر څخه پوره خبر پاتې شي.
لوبی
په آی ال ټي ۲۰ سیالیو کې ۲۵ افغان لوبغاړو قراردادونه ترلاسه کړل
د هوکړې له مخې، د سیالیو شپږ واړه فرنچایزونه مکلف دي، چې په خپلو لوبډلو کې لږ تر لږه دوه افغان لوبغاړي ولري.
د آی ال ټي ۲۰ سیالیو په پنځم پړاو کې به ۲۵ افغان کرکټ لوبغاړي د شپږ لوبډلو په جوړښت کې ولوبېږي؛ دا د افغانستان او متحده عربي اماراتو د کرکټ بورډونو ترمنځ د سټراټیژیکې همکارۍ په پایله کې شونې شوې ده.
د هوکړې له مخې، د سیالیو شپږ واړه فرنچایزونه مکلف دي، چې په خپلو لوبډلو کې لږ تر لږه دوه افغان لوبغاړي ولري.
په قرارداد ترلاسه کوونکو ۲۵ لوبغاړو کې د افغانستان د ملي لوبډلې پېژندل شوي لوبغاړي لکه راشد خان، محمد نبي، رحمانالله ګربز، ابراهیم ځدراڼ او عظمتالله عمرزی هم شامل دي.
د دوی ترڅنګ یو شمېر ځوانو او مخ پر ودې لوبغاړو هم په دې سیالیو کې د ګډون فرصت ترلاسه کړی دی.
د ۲۵ افغان لوبغاړو نومونه د شپږ لوبډلو په جوړښت کې دادي:
ابوظبي نایټ رایډرز
- ګلبدین نایب
- قیس احمد
- عرب ګل
- عبدالله ترهخېل
ډیزرټ وایپرز
- مجیب الرحمن
- ننګیالی خروټی
- سلیم ساپی
- عبدالله احمدزی
دوبۍ کپېټلز
- نور احمد
- صدیقالله اتل
- کریم جنت
- دروېش رسولي
ګلف جاینټس
- رحمانالله ګربز
- ابراهیم ځدراڼ
- عظمتالله عمرزی
- عمران میر
- وحیدالله ځدراڼ
ام آی امارات
- راشد خان
- فضلالحق فاروقي
- اللهمحمد غضنفر
- فریدون داوودزی
شارجه واریرز
- محمد نبي
- وقار سلامخېل
- فرید ملک
- شرفالدین اشرف
افغان لوبغاړو په داوطلبۍ کې ښه جګ تړونونه ترلاسه کړل
په وروستۍ داوطلبۍ کې افغان لوبغاړو د پام وړ مالي تړونونه ترلاسه کړل.
فضلالحق فاروقي د افغان لوبغاړو په ډله کې تر ټولو جګ تړون ترلاسه کړ او له ام آی امارات لوبډلې سره یې د درې سوه او اتیا زره امریکايي ډالرو پر ارزښت تړون لاسلیک کړ.
رحمانالله ګربز له ګلف جاینټس لوبډلې سره د درې سوه او لس زره ډالرو پر ارزښت خپل قرارداد وساته او اللهمحمد غضنفر له ام آی امارات سره د یو سل او پنځوس زره ډالرو پر ارزښت قرارداد ترلاسه کړ.
دغه راز محمد نبي له شارجه واریرز سره د یو سل او څلوېښت زره ډالرو او ګلبدین نایب له ابوظبي نایټ رایډرز سره د پنځه اویا زره ډالرو پر ارزښت تړونونه لاسلیک کړل.
دا تړونونه په نړیوالو شلآوریزو سیالیو کې د افغان لوبغاړو د مخ پر زیاتېدونکي ارزښت او غوښتنې څرګندونه کوي؛ ځکه افغان لوبغاړي د توپوهنې او توپاچونې په دواړو برخو کې د پام وړ وړتیا لري.
آی ال ټي ۲۰ د افغان کرکټ د ودې لپاره مهم فرصت دی
د افغانستان کرکټ بورډ اجرائیوي رییس نصیب خان ځدراڼ د آی ال ټي ۲۰ سیالیو په پنځم پړاو کې د ۲۵ افغان لوبغاړو ګډون د هېواد د کرکټ د ودې لپاره یوه مهمه لاسته راوړنه بللې ده.
نوموړي د افغانستان او متحده عربي اماراتو د کرکټ بورډونو او آی ال ټي۲۰ ترمنځ د سټراټیژیکې همکارۍ پر ارزښت ټینګار کړی او څرګندوي، چې دغې همکارۍ افغان لوبغاړو ته د لوبېدو فرصتونه برابر کړي او په افغانستان کې یې د کرکټ د پراختیا زمینه هم برابره کړې ده.
د آی ال ټي۲۰ سیالیو پنځم پړاو به د ۲۰۲۶ز.کال د نومبر له یوویشتمې د ډسمبر تر شلمې دوام وکړي، چې په کې به یې د متحده عربي اماراتو په بېلابېلو لوبغالو کې ۳۴ لوبې ترسره شي.
د دغو سیالیو دفاعي اتله ډیزرټ وایپرز لوبډله به د نومبر پر یوویشتمه په پرانیستونکې لوبه کې له ام آی امارات سره مخ شي.
د آریانا راډیو ټلویزیون په افغانستان کې د دغو سیالیو د خپرولو ځانګړي حقونه ترلاسه کړي او د هېواد د کرکټ مینهوال به وکولی شي، چې ټولې ۳۴ لوبې پر ژوندۍ بڼه وګوري.
په دغو سیالیو کې د ۲۵ افغان لوبغاړو ګډون او په هره لوبډله کې د لږ تر لږه دوه افغان لوبغاړو د شتون شرط، د افغانستان د کرکټ د مخ پر ودې وړتیاوو د څرګندولو لپاره یو مهم فرصت بلل کېږي.
-
لوبی4 days agoپه آی ال ټي ۲۰ لیګ کې د افغان او اماراتي لوبغاړو ګډون اړین شو
-
تازه خبرونه4 days agoترکیې یونان ته د اوښتو په هڅه کې ۳۵ افغان کډوال ونیول
-
لوبی3 days agoسرخپوشان خوافي د افغانستان فوټبال اتلانو لیګ نه ماتېدونکی اتل شو
-
لوبی5 days agoزیمبابوې له افغانستان څخه د دوهیمې ټسټ لوبې پر دوهیمه ورځ ۱۸۰ منډې مخکې شو
-
لوبی4 days agoارمان افسي استقلال کابل ته پنځه پر صفر ماتې ورکړه
-
تازه خبرونه4 days agoپه تېرو دوه اوونیو کې له ایران او پاکستان څخه څه باندې ۹۵ زره افغانان افغانستان ته راغلي
-
تازه خبرونه5 days agoپه جوزجان کې د بیات پاور ۴۰ میګاواټه ګازي برښنا تولیدي توربین بېرته فعال شو
-
تازه خبرونه2 days agoد اسلامي امارت مالیې وزیر د ایران د مازندران له کرنیزو او تولیدي مرکزونو لیدنه وکړه
